Гимнография прп. Гавриила Игошкина исп. (1959)

Гимнография: 
[Служба]  [Великое бдение]  [Бдение]  [Полиелей]  [Славословие]  [«на 6»]  [«на 4»]  [Тропарь]  [Кондак]  [Молитва]  [Канон]  [Акафист]
Даты: 
Иконы: 
Бдение (с литией): 

 

 

Служба преподобноисповеднику Гавриилу, архимандриту Мелекесскому


На велицей вечерни
Блажен муж: первый антифон.
На Господи, воззвах: стихиры на 8, глас 6:

Духа Святаго благодать / в тебе излияся, отче Гаврииле, / и явился еси / добрый пастырь Христовы Церкве, / за истину пострадав, // душу твою за овцы своя полагаяй.
Добродетелей деланием / новое возсиял еси зерцало благодати / и сиянием жития твоего / просвещаеши мглу человеческих согрешений, / отче Гаврииле, // моли Христа Бога даровати нам велию милость.
Светильник веры был еси, / отче Гаврииле, / свидетельствуяй истину Христову, / вся доблестне претерпел еси, / темже и благодать Святаго Духа стяжал еси; / тебе молим: // моли спастися душам нашим.
Исповедниче твердый / и подвижниче изрядный, / житием твоим Христу последуяй, / от Бога дары Духа Святаго почтен еси, / отче Гаврииле; / ныне предстоя Престолу Небеснаго Царя, // моли спастися душам нашим.


Слава, глас 6:


Блажен еси, преподобне / исповедниче Христа Бога: / преподобен, яко вся в мире оставил еси; / исповедник, яко скорбь и гонение / не разлучи тя от любве Божия, / и сего ради радуешися, // яко мзда твоя многа на Небесех.
И ныне, Богородичен, глас тойже: Кто Тебе не ублажит:
Вход. Прокимен дне и чтения три исповедником.
Премудрости Соломоновы (гл. 3, ст. 1-9):
Праведных души в руце Божией:
Премудрости Соломоновы (гл. 5, ст. 15-24):
Праведницы во веки живут:
Премудрости Соломоновы (гл. 4, ст. 7-15):
Праведник, аще постигнет скончатися:
На литии стихиры, глас 1.

Подобен: Небесных ликов радование:
Владыки Христа стопам следуя, / светом Божественнаго Духа просветивыйся, / вместилище чистоты показался еси / и Небесных видений причастник был еси, / темже Христос наследника тя Царствия показа / и сожителя со всеми святыми, / еже и нам улучити, отче, молися, // совершающим любовию память твою.
Духа благодать от Бога стяжавый, / отче богоносне Гаврииле, / православия учением / многия добре упасл еси ко спасению, / обаче гонителей безбожных никакоже убоялся еси, / бездверная уста истиною дерзновенно заграждаяй, / темже и прослави тя Господь: // моли спастися душам нашим.
Слава, глас 6:
Освящен весь быв Богу / от юности твоея, отче Гаврииле, / верных добрый предстателю / и Духа Святаго жилище, / испроси нам, чтущим тя, // мир и велию милость.
И ныне, глас тойже:
Под кров Твой прибегаем, / Пресвятая Богородице, / молим Тя, земнороднии, / прибежище наше, Владычице, // спаси ны от безмерных прегрешений наших.
На стиховне стихиры, глас 5.
Подобен: Радуйся, Живоносный Кресте:
Радуйтеся, людие, / се бо новый чудотворец нам явися, / врач и помощник во всяцей скорби, / заступник и врагов прогонитель, / молитвенник неусыпный ко Господу // о всех верою к нему притекающих.
Стих: Честна пред Господем / смерть преподобных Его.
Радуйся, священная главо, / верный Христа служителю, / отче преподобне Гаврииле, / Православия исповедниче, / исполнителю всякия добродетели, / болящих целителю и страждущих утешение, // крепкая надеждо всех теплою верою тя призывающих.
Стих: Блажен муж, бояйся Господа, / в заповедех Его восхощет зело.
Радуйся, исповедниче, / преподобне отче наш Гаврииле, / теплый молитвенниче и скорбных сострадальниче, / незлобием и правдою украшаем, / светел путь ко Христу показавый, / и по отшествии от земных нас не оставляеши, // славим память твою, отче богоприятне.
Слава, глас 4.
Подобен: Яко добля:

Просияша добрая дела твоя, / яко солнце, на земли и на Небеси, / Христов угодниче Гаврииле: / исповедал бо еси пред гонители веру истинную, / заточения не убоявся; / темже молися, преподобне отче, // даровати нам велию милость.
И ныне, Богородичен, глас тойже:
Воззри, Пречистая, / на люди Твоя согрешившия, / и помощию скоро предвари, / избави ны от враг видимых и невидимых, / и милость Твою низпошли, // грешных едина Предстательнице.
На благословении хлебов, тропарь святаго, дважды,
и Богородице, Дево, радуйся: единожды.


Тропарь, глас 3:
Вельми светел явися нам подвиг жития твоего, / исповедниче Христов Гаврииле, / любве ради ко Господу изшел еси с радостию на скорбь и лишения, / крест свой носяй / и тако образ терпения показуяй, / верныя в годину озлобления / пастырски в вере соблюл еси, / дерзновением благодать Святаго Духа стяжав, / темже убо вопием ти: // молитвами твоими спаси души наша.


На утрени


На Бог Господь: тропарь святаго дважды.
Слава, и ныне, Богородичен гласа.
По первом стихословии седален, глас 1:

Излияся благодать Святаго Духа в житии твоем, отче преподобне Гаврииле, и явился еси добрый пастырь Христова стада, поучаяй чада твоя ближняго любити, якоже себе, Бога же всем сердцем и крепостию своею, и верными быти Ему даже до смерти.
Слава, и ныне, Богородичен:
Предстательнице всеблагая людем христианским, у Креста Сына Своего нас сыноположшая, и ныне матерними молитвами Твоими избавляемся всяческих бед, к Тебе взывающе: Мати Пречистая, призри на чада Твоя, долу сущая, и с угодником Твоим Гавриилом моли Христа Бога согрешений оставление нам даровати.


По втором стихословии седаден, глас 3:
Попечений мирскаго жития отверглся еси, ангельское житие восприем, пламенною любовию ко Христу душу удобривый и чудес от Бога благодать богатно приявый: Гаврииле боголюбче, о нас молися, благочестно восхваляющих тя.


Слава, и ныне, Богородичен:
Явилася еси паче всех Ангел Славнейшая и всея твари Честнейшая, Заступница еси обидимым и ненадеянным Надежда, подаждь утешение нам, в скорби сущим, простри пречистыя Твои руце к Сыну Своему и молися, Владычице Небесная, со святым Гавриилом, помиловатися душам нашим.


По полиелеи седален, глас 3:
Серафимскою любовию пылаяй, на земли пожил еси яко безплотен, отче наш Гаврииле, ныне убо равное стояние имаши со Ангелы на Небеси. Темже тя, яко человека Божия, ублажающе, память твою совершаем радостне, чающе молитвами твоими улучити мир и велию милость.
Слава, и ныне, Богородичен:
Пресвятая Дево, паче разума Христа Бога рождшая, всем христианом Мати преблагая, заступи, помилуй и спаси ны, грехми многими обремененныя, не остави, изведи, Владычице, из бездны страстей Тебе взывающия, согрей ны теплотою любве неложныя и сохрани под кровом Твоим, Всенепорочная.
Степенна, 1-й антифон, глас 4.
Прокимен, глас 4: Честна пред Господем / смерть преподобных Его. Стих: Что воздам Господеви о всех, яже воздаде ми?
Всякое дыхание: Евангелие от Луки, зачало 24.
По 50-м псалме стихира, глас 6:
День торжества наста, / днесь память святаго Гавриила совершающе, / в радости сердец восхвалим / Христа Бога нашего, / прославльшаго дивнаго угодника Своего / и пастыря нашего, / егоже ныне прилежно молим: / о пречестный отче наш Гаврииле, / яко имеяй дерзновение ко Господу, / мир державе и людем испроси // и душам нашим велию милость.


Канон преподобноисповеднику Гавриилу, глас 2.


Песнь 1.
Ирмос: Грядите, людие, поим песнь Христу Богу, раздельшему море и наставльшему люди, яже изведе из работы египетския: яко прославися.
Иисусу Сладчайшему: Отверзи уста моя, Господи, и просвети ум, омраченный суетою, и разреши косный мой язык, да светло и радостно воспою исповедника Твоего и добраго пастыря нашего, преподобнаго Гавриила пречуднаго.
Преподобному Гавриилу: Души твоея чистоту стяжав, без неяже никтоже когда узрит Господа, Гаврииле, отче наш, страсти окаянныя души моея исцели молитвами твоими.
Разум от Бога приим, нечестивых уста заграждал еси, пред отступники и гонители Христа исповедуя дерзновенно.
Богородичен: Радости сердце мое исполни, Богородице, приимшая от Архангела радости весть, ныне печаль греховную во мне потребляющи, душу мою исполни любовию ко Христу.
Катавасия: Отверзу уста моя:


Песнь 3.
Ирмос: На камени мя веры утвердив, разширил еси уста моя на враги моя, возвесели бо ся дух мой, внегда пети: несть свят якоже Бог наш, и несть праведен паче Тебе, Господи.
Яко крин райский, процвел еси ко украшению Церкве Российския, удобренный непорочностию жития твоего, да и мы, грешнии, света Христова насладимся.
Любовию исполнь Христовою, явился еси источник благодати, напаяяй ны словес твоих учением, отче Гаврииле, темже любовию память твою совершаем.
Теплотою веры согрей души наша, от грехов неисчетных оледенелыя, дух же благочестия вкорени в сердца наша, память твою чтущих.
Богородичен: Святейшая сил безплотных, Честнейшая всея земныя твари, Дево Пречистая, молися ко Господу со святым Гавриилом, от бед избавитися нам.


Седален, глас 5:
Исповедниче честный, отче Гаврииле, талант, от Бога данный, преумноживый, ныне Церковь Русскую украшаяй, в радость Господа твоего сподобился еси внити, Ему же предстоя, моли спастися нам.
Слава, и ныне, Богородичен:
Помощь Твою призывающих не презри, Богородительнице, едина бо еси упование рода христианскаго, но предвари грехи многими поглощенныя и спаси ны, Царице всеблагая.


Песнь 4.
Ирмос: Услышах, Господи, глас Твой, Егоже рекл еси глас вопиющаго в пустыни, яко возгремел еси над водами многими, Твоему свидетельствуяй Сыну, Весь быв сошедшаго Духа, возопи: Ты еси Христос, Божия мудрость и сила.
Святче Божий, ныне предстоя Престолу милосердия Христова, молися о людех, в заблуждении ума сущих, и направи нас на путь покаяния.
Тако просветися свет твой пред человеки добрыми делы, имиже явился еси в скорбех утешитель и в болезни врач, да вси прославим Отца Небеснаго, давшаго нам таковаго предстателя.
Духа Святаго храм был еси, отче Гаврииле, вмещаяй в себе Божественную благодать на домостроительство спасения паствы твоея и маловерным на утверждение.
Богородичен: Уповаем на помощь Твою, Богородице, верующе в толикое Твое милосердие к людем согрешшим, и просим Тя прилежно: исправи пути живота нашего, Мати Пречистая.


Песнь 5.
Ирмос: Света подателю и веков Творче, Господи, во свете Твоих повелений настави нас: разве бо Тебе, иного бога не знаем.
Отче Гаврииле, первых христиан страданий причастник был еси, узы и гонения за Христа претерпеваяй, Егоже моли о душах наших.
Силою Господнею укрепляем, на брань с богоотступники изшел еси благодерзновенно, тех же злобу низложил еси смирением твоим, Христу зовый: Ты моя крепость, Господи!
Непреложное показуя воистину терпение, стал еси яко адамант, многая скорби и узы приемля веры во Христа ради, Тому молися, спастися чтущим память твою.
Богородичен: Оставления многих согрешений молитвами Твоими, Дево, уповаем получити, едина бо Надежда еси рода христианскаго.


Песнь 6.
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Явися благодать велия людем православным в прославлении твоем, отче Гаврииле, ибо ныне теплаго тя молитвенника обретоша.
Пастыря тя добраго вемы, мудре стадо твое во дни скорбны от враг упасшаго, и ныне паству твою в вере сохрани, во еже пребыти нам в мире и любви Божией.
Алчущия правды пищею Небесною питал еси во дни глада духовнаго, свобождая тех тьмы греховныя и ко Христу приводя.
Богородичен: От скорби душевныя вопием Ти, Владычице: всех христиан молитвы приими, едина бо еси надежда и упование душ наших.


Кондак, глас 2:
Крепости Божия соименник / и причастник Божия благодати явился еси, / отче Гаврииле, / преподобием и исповедничеством / истину Православныя веры утверждали, / иго Христово до конца восприял еси, / темже и прославлен еси со святыми, // моли Христа Бога спастися душам нашим.


Икос:
От юности твоея вся земли благая ни во чтоже вменивый, блаженне, Единому Господу, издетска тобою возлюбленному, всем сердцем послужити возжелел еси, и, чин ангельский в годину тяжкую прияти сподобивыйся, отче преподобне, яко воин доблий Церкве Христовы в броню веры и правды оболченный, на брань с безбожники и отступники изшел еси; темже и за истину многая скорби и гонения потерпев, Царствия Небеснаго сонаследник явился еси, ныне же Церкве Русския новый святый показался еси, Гаврииле, моли Христа Бога спастися душам нашим.


Песнь 7.
Ирмос: Богопротивное веление беззаконнующаго мучителя высок пламень вознесло есть: Христос же простре богочестивым отроком росу духовную, Сый благословен и препрославлен.
Радостию ликуем, людие пределов Симбирских, сошедшеся на честное прославление твое, отче Гаврииле, единым бо сердцем прославим прославльшаго тя Господа, Иже благословен и препрославлен.
Отче честный, предстояй на Небесех, не забуди нас, долу сущих: от всяких находящих бед сохрани, раздоры и брани умири молитвами твоими ко Христу, Иже благословен и препрославлен во веки.
Духа Святаго благодать почи на тебе, отче Гаврииле, светильник бо веры и благочестия показался еси изрядный, целителю душ и телес к тебе притекающих, да благословим и препрославим Господа во веки.
Богородичен: Владычице, угаси пещь страстей наших милосердием Твоим, да воспоем Тя со всеми избранными Твоими, яко благословенна еси и препрославленна.


Песнь 8.
Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.
Яко луч Света Христова, возсиял еси, просвещая всякаго грядущаго враты тесными, да светом твоим озаряеми, не заблудим в пути греховнем и, вечнаго Света достигше, вкупе с тобою возопием: благословите, вся дела Господня, Господа.
Любви Христове подражателю, отче Гаврииле, вся наша братоненавидения умири, да тобою в любви евангельстей споспешествуеми, молитвенно память твою совершающия и поющия: благословите, вся дела Господня, Господа.
Непреоборим воин явился еси в деле Господни, отче Гаврииле, во всем покоривыйся воли Его святей, нимало взираяй на скорби, узы и гонения, вся силою Христа побеждал еси, вопия: благословите, вся дела Господня, Господа.
Богородичен: Свят день, воньже собра ны Мати Божия прославити угодника Своего Гавриила, чудесы своими пети нас побуждающаго: благословите, вся дела Господня, Господа.


Песнь 9.
Ирмос: Безначальна Родителя Сын, Бог и Господь, воплощься от Девы, нам явися, омраченная просветити, собрати расточенная: тем Всепетую Богородицу величаем.
Веру соблюл течение скончал еси, темже дадеся тебе венец в Царствии Христовем; утверди и нас, маловерием колеблемых, да не будем неверии, взирающе же на честный твой образ, спасение улучим.
Всяк с верою моляйся по прошению приемлет, темже молим тя, угодниче Божий Гаврииле, являеши бо ся в скорбех утешитель, в печалех помощник: не остави нас, совершающих память твою.
Сердцем твоим к нетленным устремился еси и вся, яже на земли, отринул еси. Помози и нам, отче Гаврииле, взыскати Правды и Царствия Божия.
Богородичен: Матерь Божию, утешение наше, приидите, вси восхвалим: Та бо неложно обещася быти нам Помощница до скончания века.


Светилен.
Благодать Духа Святаго богатно в тя вселися, отче Гаврииле, и предуготовавши чистотою душу твою, сотвори тя наследника Небеснаго Царствия и молитвенника непреложна о душах наших.
Слава, и ныне, Богородичен:
Пети Тебе сподоби, Купино Неопалимая, ибо Свет Невечерний от чрева Твоего возсия, мрак души моея озари, Дево всесвятая, и прогони мглу страстей моих, едина Всепетая.


На хвалитех стихиры на 4, глас 4:
Воздержанием добре воспитався, / на высоту добродетелей возшел еси, / исповедничества одеждею и жития преподобием украшенный, / божественною благодатию осияваем, / просвети и нас, почитающих тя, // молитвами твоими, отче Гаврииле.
Отче Гаврииле, / Церкви Христовой добре послужил еси, / дарованный талант умноживый, / в радость Господа твоего вшел еси, / Емуже предстоя со Ангелы, святе, // молися о душах наших.
Якоже злато, огнем искушаемо, / чисто является, / тако и ты, отче Гаврииле, / искушен быв узами заточения, / гонения мужественно претерпел еси, / и ныне житие твое озаряет души наша, / маловерия облаком омраченныя, / во еже славити Христа Бога нашего // и Того велию милость.


Слава, глас 8:
Отче Гаврииле, / верный и благий рабе Господень, / прилежный делателю винограда Христова, / паству свою напоив водою живою, / семя веры и благочестия возрастил еси / и, ныне Богу предстоя, // молися со всеми святыми о спасении душ наших.


И ныне, Богородичен:
Владычице, приими молитвы раб Твоих / и избави нас // от всякия нужды и напасти.
Славословие великое. И отпуст.
На литургии:
Прокимен, глас 7: Восхвалятся преподобнии во славе и возрадуются на ложах своих. Стих: Воспойте Господеви песнь нову:
Апостол к ефесеем, зачало 233 (гл. 6, ст. 10-17).
Аллилуия, глас 6: Блажен муж бояйся Господа, в заповедех Его восхощет зело. Стих: Сильно на земли будет семя его:
Евангелие от Луки, зачало 64 (гл. 12, ст. 8-12).
Причастен: В память вечную будет праведник:

 

Тропарь: 

 

 

Тропарь, глас 3:


Вельми светел явися нам подвиг жития твоего, / исповедниче Христов Гаврииле, / любве ради ко Господу изшел еси с радостию на скорбь и лишения, / крест свой носяй / и тако образ терпения показуяй, / верныя в годину озлобления / пастырски в вере соблюл еси, / дерзновением благодать Святаго Духа стяжав, / темже убо вопием ти: // молитвами твоими спаси души наша.

Кондак: 

 

 

Кондак, глас 2:


Крепости Божия соименник / и причастник Божия благодати явился еси, / отче Гаврииле, / преподобием и исповедничеством / истину Православныя веры утверждали, / иго Христово до конца восприял еси, / темже и прославлен еси со святыми, // моли Христа Бога спастися душам нашим.

Молитва: 

 

 

Молитва
 
О добрый пастырю и доблий воине Христов, скорый помощнике и теплый заступниче, богоблаженный угодниче Божий и Православия твердый исповедниче Гаврииле! Имеяй велие дерзновение пред Престолом Всевышняго, не остави нас молитвами твоими, с любовию и верою к тебе притекающих. Ты бо от лет ранних юности твоея огнь любве Божественныя в сердце твоем ко Господу возжегл еси, жизнь свою всецело Богу посвятивый, наипаче нищету духовную стяжавый, яко раб благий, дела богоугодная кротко и смиренно творил еси, темже и надели тя Господь дары Духа Святаго, имиже и поныне точиши чудеса многая. Молим тя, отче Гаврииле, призри на люди, зде стоящия, и благодатию, ти Свыше данною, уврачуй души наша, грехом изъязвленныя, исцели телеса наша многоболезненная, старость поддержи, вдовиц заступи, сирых и обездоленных окорми, супружество верно сохрани. Нас же вразуми, научи и воспитай чада наша в вере Православной, дабы не уклонятися нам от правыя стези, но, храняще апостольская предания, твердо Христа Бога исповедати. Ей, святче Божий! Умягчи сердца наша, житейскими попеченьми окамененная, и помози нам милосердным быти, во еже, долга христианскаго не забывающе, единому от меньших братий Господа нашего Иисуса Христа милостиво послужити. Дабы, егда явитися Господеви нашему во славе Отца Своего со Ангелы Святыми, в радости услышати глас Его: приидите, благословеннии Отца Моего, наследуйте уготованное вам Царствие от сложения мира. Аминь.
 
 
Акафист: 

 

 

Акафист преподобноисповеднику Гавриилу, архимандриту Мелекесскому
 


Кондак 1
Избранный подвижниче и истинный пастырю Церкве Русския, / изрядный угодниче и твердый исповедниче Христов, / богоблаженне отче 
наш Гаврииле! / Почитаем тя любовию и похвальная восписуем ти: / ты бо в заточении неотступно пребыл еси верен Христу, / в скорбех, 
тесноте и гонениих благодаривый Бога. / Не престай молитися, поминая чад твоих, / да спасет Господь взывающих и поющих ти: // Радуйся, отче наш Гаврииле, теплый молитвенниче о душах наших.


Икос 1
Ангельскому житию поревновавый, от юности чистоту и верность Христу Богу сохранил еси, Господеви жизнию своею послужити желая, 
вся земная и временная оставил еси, да приобрящеши богатство неиждиваемое. Сего ради и зовем тебе сице:
Радуйся, родителей благочестивых чадо богоизбранное;
радуйся, измлада ангельскими нравы украшенный.
Радуйся, чистое житие от юности возлюбивый;
радуйся, в богомыслии отрочество твое проводивый.
Радуйся, от лет юных сердце твое к подвижничеству склонивый;
радуйся, издетска к молитве и послушанию прилежавый.
Радуйся, еще во отрочестве к иноческому житию устремивыйся;
радуйся, волею своею воли Божией покоривыйся.
Радуйся, отче наш Гаврииле, теплый молитвенниче о душах наших.


Кондак 2
Видя Церковь Русскую раздираему, яко ризу Христову, от безбожных и злых, не убоялся еси, отче Гаврииле, но желая, аще ти есть душу 
свою за веру положити, во всем последовати Христу, темже и дарова тя Господь пастыря верна и кротка, да упасеши овцы Его. Мы же с 
благодарностию взываем Богу: Аллилуиа.


Икос 2
Разумом ти Свыше данным, богомудре Гаврииле, о душах чад Христовых усердное попечение имевый, темже убо ограждая их от ереси и 
раскола, поученьми твоими веру истинную в сердцах их насаждал еси. Мы же, ведуще тя о спасении нас тако пекущася, с любовию вопием 
ти:
Радуйся, яко ярость богоборцев ни во чтоже вменил еси;
радуйся, яко Церкви Божией послужити не убоялся еси.
Радуйся, пастырю, Свыше умудренный;
радуйся, благодатию Божиею просвещенный.
Радуйся, веры истинныя ревнителю;
радуйся, христианскаго благочестия рачителю.
Радуйся, кротостию украшенный;
радуйся, смирением обогащенный;
Радуйся, отче наш Гаврииле, теплый молитвенниче о душах наших.


Кондак 3
Сила Божия подается с верою призывающим имя Его, тя же Господь сподоби в годину тяжкую чин ангельский прияти, крепостию Божиею 
именова, темже воздвигнув тя воистину воина верна Церкве Христовы. Ты же, прияв божественную благодать возблагодать, вопияше Богу: Аллилуиа.


Икос 3
Имеяй велию ревность в исполнении устава церковнаго, службу в храме благоговейно со слезами совершал еси, такожде и глаголы Божия 
неустанно проповедуяй, зело усердно пастырски подвизался еси, самоотверженно Богу и людям служа. Темже и мы, горение твое по Бозе 
видевше, поем ти таковая:
Радуйся, чистоты ангельския исполненный человече;
радуйся, неустанный словес Божиих проповедниче.
Радуйся, Церкве Христовы воине доблий;
радуйся, рабе благий и верный.
Радуйся, апостольских преданий хранителю;
радуйся, церковнаго устава блюстителю.
Радуйся, Православия исповедниче непреложный;
радуйся, Господа Вышняго служителю благоговейный.
Радуйся, отче наш Гаврииле, теплый молитвенниче о душах наших.


Кондак 4
Буря ярости и гонений, обрушившаяся на Церковь Русскую, поглоти в пучину лютыя скорби верныя люди Божия: мнози бо архиереи и 
священницы в заточении томяхуся, ты же, о тех печаляся, любвеобильный отче, со духовными чады твоими, христианския любве 
исполненными, втайне приношения собираяй, в темницу посылал еси. Мы же, истинное твое братолюбие ублажающе, взываем Богу: 
Аллилуиа.


Икос 4
Слышаще безбожницы о тебе, яко пастырь почитаемый еси, и лжесвидетельствующе, наведоша на тя чреду гонений на долгия годы. Ты же, 
помышляя, яко сие есть в любви и вере Божией тебе испытание, со смирением неложным приял еси крест твой, радуяся, яко Господь 
сподоби тя пострадати и потерпети вся скорби, выпавшия Православным. Темже, мужество твое славяще, величаем тя словесы таковыми:
Радуйся, пастырю благий и любвеобильный;
радуйся, милости и сострадания к страждущим исполненный.
Радуйся, христианскаго милосердия верный учителю;
радуйся, неисчерпаемый в любви тайноделателю.
Радуйся, верный рабе, Христу последовавый;
радуйся, крест Его на ся вземый.
Радуйся, клеветы со смирением приявый;
радуйся, поношения с кротостию терпевый.
Радуйся, отче наш Гаврииле, теплый молитвенниче о душах наших.


Кондак 5
Божественныя милости исполненный, предивный отче Гаврииле, аки верный пастырь Христовы Церкве, и в заточении твое служение не 
оставил еси, обаче и в тяжких испытаниих не престал еси помогати ближним твоим, просвещаяй вся светом веры Православныя. Мы же, 
любовию твоею согреваемии, благодарне вопием Богу: Аллилуиа.


Икос 5
Видевше в заточении пребывающии еже по Бозе житие твое, преподобне, не токмо людие верующии к тебе стекахуся, помощи 
молитвенныя просяще, но и разбойницы, по злым делом своим осужденнии, познаху тя отца, любовию преисполненнаго. Темже, воистину 
тя пастыря добра почитающе, приносим ти таковая:
Радуйся, пастырскаго долга непоколебимый исполнителю;
радуйся, мира Божия благосклонный подателю.
Радуйся, Божия благодати дивный таинниче;
радуйся, обремененных и озлобленных скорый поборниче.
Радуйся, скорбящим велие утешение подаваяй;
радуйся, незлобием твоим тяжкосердых умягчаяй.
Радуйся, и в заточении паству твою молитвою не оставивый;
радуйся, милосердный отче, о чадех твоих сердцем горевый.
Радуйся, отче наш Гаврииле, теплый молитвенниче о душах наших.


Кондак 6
Проповедь веры христианския явися само житие твое, досточудне Гаврииле, егоже не могуще терпети, богоборцы, не взирающе на седины 
твоя и болезни, всякая прещения тебе творяху, ты же, святый отче, вся страдания безропотно и мужественно претерпеваяй, в благий 
Промысл Божий непоколебимо верил еси, взывая к Тому: Аллилуиа.


Икос 6
Возсиял еси Божиею благодатию, юже стяжа, преподобне, за всецелое себе отречение ближняго твоего ради, темже и прослави тя Господь 
дары Духа Святаго, иже суть болезней исцеление и судеб Божиих тайновидение, имиже во славу Господа потрудился еси. Мы же, дивящеся таковому о тебе Божию произволению, прилежно вопием тебе сице:
Радуйся, светильниче веры, горяй и светяй;
радуйся, стамно Божия благодати.
Радуйся, дары Духа Святаго обогащенный;
радуйся, сострадания к ближнему источниче преистекаемый.
Радуйся, в немощи твоей тяжкия труды понесый;
радуйся, лютый мраз, биения и поругания терпевый.
Радуйся, смертное испив, по глаголу Божию, неврежден бывый;
радуйся, за враги твоя по заповеди Христовой моливыйся.
Радуйся, отче наш Гаврииле, теплый молитвенниче о душах наших.


Кондак 7
Хотя всем сердцем твоим, блаженне Гаврииле, единому Господу работати, себе ни во чтоже вменил еси, труды к трудом в дусе кротости и 
смирения прилагая, постом и бдением плоть свою умерщвляя, дерзновение в молитве стяжал еси, всех призывая верно славити Бога, в 
Троице Единаго, и воспевати Ему: Аллилуиа.


Икос 7
Новаго показа тя Господь заступника и молитвенника о нас, грешных, яко помощию безмерною и любовию неисчерпаемою многия упасл 
еси ко спасению. Мы же, чтуще святую память твою, со умилением взываем ти:
Радуйся, жизнию монашескою усердно подвизавыйся;
радуйся, на ниве Христовой изрядно потрудивыйся.
Радуйся, всецелое послушание архипастырем твоим имевый;
радуйся, постом и бдением плоть твою изнуривый.
Радуйся, отче чадолюбивый, о детех твоих тепле моливыйся;
радуйся, о ближних твоих прилежно пекийся.
Радуйся, винограда Христова верный делателю;
радуйся, и за ны пред Богом усердный ходатаю.
Радуйся, отче наш Гаврииле, теплый молитвенниче о душах наших.


Кондак 8
Странник быв и бездомен, из заточения в весь свою явился еси, блаженне, не имеяй где главу приклонити, во всем уподобивыйся Христу, 
якоже друзи и искреннии твои далече от тебе сташа и бояхуся убо к себе прияти, ложно тя врага народа именующе. Но верен Бог любящим 
Его, ибо не остави тя, и Тому поем: Аллилуиа.


Икос 8
Всем был еси вся, да многия ко Христу приведеши, и вся чада твоя, светом веры, надежды и любве твоея озаряемии, стекахуся к тебе, 
досточудне Гаврииле, со всея страны нашея. Ты же, яко чадолюбивый отец, недуги своя превозмогая, без устали днем и нощию двери твоея души страждущим отверзал еси. Мы же ти, яко благодетелю, с любовию тепле вопием таковая:
Радуйся, многи скорби, болезни и нужды Христа ради понесый;
радуйся, странничеством твоим Христу уподобивыйся.
Радуйся, неисчерпаемый кладезю веры, надежды и любве;
радуйся, яко сердце твое уподобися неопалимей купине.
Радуйся, о сирых и убогих с любовию попечение имевый;
радуйся, бедных вдовиц в нуждах их заступавый.
Радуйся, в бедах и напастех помощи скорый подателю;
радуйся, и о всех притекающих к тебе верный предстателю.
Радуйся, отче наш Гаврииле, теплый молитвенниче о душах наших.


Кондак 9
Всякия скорби, болезни и труды в жизни твоей непоколебимо претерпел еси, в сердце твоем Единаго Господа имеяй, темже мирныя, 
блаженныя и христианския кончины от Бога сподобивыйся, странствие земное совершил еси и в Горния обители вселился еси, вознося 
песнь Богу: Аллилуиа.


Икос 9
Витиям многовещанным не довлеет словес, во еже изрещи всю скорбь, еюже исполнися сердца верных, с любовию к честным останком 
твоим стекающихся, и со слезами ко гробу твоему припадающих, и поминающих тя словесы таковыми:
Радуйся, крине, мира Христова благоухания исполненный;
радуйся, светильниче лучезарный, божественным елеем наполненный.
Радуйся, лозо неувядаемая, мног плод принесшая;
радуйся, кадильнице златая, фимиам молитвы к Богу вознесшая.
Радуйся, адаманте, крепость в терпении нам показавый;
радуйся, каменю, образ твердости в вере нам явивый.
Радуйся, столпе непоколебимый Церкве Православныя;
радуйся, светлая заре незаходимаго Солнца правды.
Радуйся, отче наш Гаврииле, теплый молитвенниче о душах наших.


Кондак 10
Спасение души твоея от Бога улучивый, предивне Гаврииле, в радость Господа вшел еси, и ныне, венцем нетленным увенчавыйся, со 
Ангелы ликуеши, взирая на Всецаря Творца; Того моли, да сподобит Господь и нас купно с тобою воспевати Ему: Аллилуиа.


Икос 10
Стена быв при жизни всем приходящим к тебе, такожде и по смерти ны не оставлявши твоим заступлением; духом ныне пребываяй у 
Престола Вышняго, за всех с верою и любовию тебе молящихся тепле предстательствуеши и помощь неоскудную подаеши. Тебе бо, яко 
мощному заступнику о душах наших, благодарственно поем сицевая:
Радуйся, от лет ранних Бога всем сердцем возлюбивый;
радуйся, верен Тому до конца дний твоих пребывый.
Радуйся, жизнию твоею безраздельно Господеви послуживый;
радуйся, темже Царствие Небесное себе унаследовавый.
Радуйся, всех к тебе прибегающих скорый услышателю;
радуйся, о всех тебе с верою молящихся прилежный попечителю.
Радуйся, помощниче всем в бедах и напастех сущим;
радуйся, целителю душею и телом болезнующих.
Радуйся, отче наш Гаврииле, теплый молитвенниче о душах наших.


Кондак 11
Песнь благодарственную восписуют людие Православнии, радующеся о толиком благодеянии Божием, яко Церковь Русская ныне украсися 
сонмом новых мучеников и исповедников Российских, с нимиже и ты, отче Гаврииле, вкупе веселяся в чертозех райских, воспеваеши Богу: 
Аллилуиа.


Икос 11
Свет велий веры христианския силищася сатана затмити, седмьдесят лет мучаше и убиваше люд Православный, темже убо сотворь 
невиданное доселе воинство Христу Богу нашему, Имже и посрамлен бысть. Тебе же, отче Гаврииле, яко верному ратнику воинства сего, 
воспеваем сице:
Радуйся, прещений нечестивыя власти не убоявыйся;
радуйся, в роде сем Господа исповедати не постыдивыйся.
Радуйся, иго Христово на рамена своя вземый;
радуйся, вслед Господа тесными враты ходивый.
Радуйся, вместо сладости земныя терния избравый;
радуйся, ныне же нетленным венцем от Бога украсивыйся.
Радуйся, яко Христа ради и Евангелия себе отверглся еси;
радуйся, яко нищетою духовною богатство неиждиваемое стяжал еси.
Радуйся, отче наш Гаврииле, теплый молитвенниче о душах наших.


Кондак 12
Благодать Божия, еюже излияся море чудес от честных мощей твоих, предивне Гаврииле, днесь собра вся верныя, с благоговением и 
любовию чтущия святую память твою и молящия ти: не остави нас и ныне предстательством твоим, обидимыя заступи, болящия исцели, в 
беду впавшия свободи и всех нас сохрани молитвами твоими, да выну поем Богу: Аллилуиа.


Икос 12
Поюще песнь благодарения Всещедрому и Человеколюбцу Богу, прославльшему тя, яко вернаго исповедника Церкве Русския, ублажаем 
болезни и труды твоя, имиже во славу Божию поработал еси, восхваляем подвиги твоя, яже за Христа претерпети сподобился еси, 
почитаем пастырскую кротость и смирение твое, яко добре упасл еси чада Православная, и воспеваем тя хваленьми сицевыми:
Радуйся, служителю Христов и любимиче Божий;
радуйся, пастырю благий, смиренный и кроткий.
Радуйся, нуждным и отягощенным неложное вспоможение;
радуйся, скорбящим и обуреваемым присное утешение.
Радуйся, архимандрите, духовныя овцы добре хранивый;
радуйся, друже Божий, крест Христов доблестне носивый.
Радуйся, любимаго Господа лик пресветлый видети сподобивыйся;
радуйся, яко во светлости святых Его ныне пребываеши.
Радуйся, отче наш Гаврииле, теплый молитвенниче о душах наших.


Кондак 13
О преславный и достохвальный исповедниче Христов, преподобне и богоносне отче наш Гаврииле, пастырю кроткий и чадолюбивый! В 
умилении молебно тебе предстоящих не презри, но твоим предстательством заступи и помози богоугодно течение жизни нашея скончати, 
Христа Бога верно и небоязненно исповедующе, да ныне и присно с тобою вкупе и всеми святыми поем Ему: Аллилуиа, аллилуиа, 
аллилуиа.
Сей кондак чтется трижды, затем 1-й икос и 1-й кондак.