Гимнография сщмчч. Германа (Косолапова), еп. Вольского, и иже с ним пострадавших Геннадия (Махровского), Андрея (Шанского) протоиереев, Михаила (Платонова) и Олимпа (Диаконова) иереев, Саратовских (†1919)
Гимнография:
Даты:
Тропарь:
Тропарь священномученику Герману, глас 2:
Богонасажденный цвете райский, / у источников воды приснотекущия, / процвел еси земли нашей, блаженне страдальче, / ризы своя убеливший током крови твоея, / венцем победным яко доблий подвижник венчаешися, / славо и похвало Церкве Российския, / ныне о чтущих память твою // ко Владыце помолися, святе Германе.
Тропарь священномученику Михаилу, глас 5:
Псаломски житие свое провождая, / еже пети Богу нашему, дондеже есть, / течение яко преславный священник и мученик скончал еси, / темже на судищи богоборчестем / пред гонители истину провозглашая, / крови своея пролитием, о Михаиле, / засвидетельствовати сию сподобился еси. / Ныне же, в нетленней славе пребывая, // о земли Саратовстей и о людех ея помолися.
Кондак:
Кондак святым, глас 3:
Веселия днесь да исполнится верных собрание, / и да ликовствует земля Саратовская, / благоуханием мученических ваших кровей исполняема, / яко мощи ваша в себе имущая. / Се бо вас воздвиже Господь / яко крепких и доблих страдальцев, / и исповедания крепость вам подаде; / мы же ныне, собраннии в честней памяти вашей, / тепле молим вас: / о всечестныя страстотерпцы и доблии пастырие, / души своя евангельски за овцы положившия, / не престайте даже доднесь заступати нас, // на земли память вашу чтущих.
Молитва:
Молитва
О предивне святителю Германе, словесных овец пастырю добрый, во Царствие Небесное стезею мученичества прешедый, дерзновение велие восприемый от Спаса Христа, Укрепляющаго мученики в подвизех их!
Поминая ныне велие ревнование твое и попечение о душах вверенных тебе овец стада Христова, яко чада ко отцу ныне прибегаем к тебе и умиленно просим: пролей богоприятную твою молитву пред Престолом Пастыреначальника и Архиерея Великаго, Господа нашего Иисуса Христа, да призрит на ны, непотребныя рабы Своя, и помилует нас, во многия прегрешения впадшия.
Крепкий за Церковь Святую стоятелю, судилище беззаконное от богоборных претерпевый, узы темничныя и самое убиение приемый, не престай защищати нас, чада церковная, аще и премного огорчеваем благость и милосердие Всещедраго и Долготерпеливаго Спасителя нашего. Да не будем мы снедию противнику Божию, и часть да не улучим в державе его, яко же грешницы нераскаяннии и врази Божии, но многомощным предстательством твоим помиловани будем, и от сего дне даже до кончины земнаго нашего жития возможем заповеди Господни право творити, и по исходе от жизни сея временныя узрим купно с тобою Славу и Велелепие Присносущныя и Неразделимыя Троицы, и тако восхвалим Ю в безконечныя веки. Аминь.
