Гимнография прп. Симеона Псково-Печерского (1960)

Гимнография: 
[Служба]  [Великое бдение]  [Бдение]  [Полиелей]  [Славословие]  [«на 6»]  [«на 4»]  [Тропарь]  [Кондак]  [Молитва]  [Канон]  [Акафист]
Даты: 
Иконы: 
Бдение (с литией): 

 

 

Служба преподобному Симеону 
 
На велицей вечерни Блажен муж: первый антифон.
На Господи, воззвах: поем стихиры, глас 1:
Подобен: Небесных чинов радование:
Яко древо многоплодное,/ во обители Печерстей преподобием процвел еси,/ отче Симеоне преблаженне,/ трудов елеем житие твое умастив,/ радуяся, в селения райская преставился еси,// и достойная потов твоих приемлеши воздаяния.
Измлада божественную мысль приемля,/ страхом Божиим оградил еси себе,/ отче Симеоне богодухновенне,/ темже, иночества узкий путь избрав,/ чистоты жития твоего доброту показал еси// и послушания явил еси образ.
Незлобием и кротостию украшаемь,/ любовь Христову стяжал еси,/ отче Симеоне богоприятне,/ еюже первозданный в человецех образ зря,/ души многия ко спасению привел еси,// от древняго змия лукавства тех избавивый.
Слава, глас 6:
От дольняго к горнему/ промыслом свыше направляемь,/ телесем к пещерам богозданным притекл еси,/ душею же на гору небесную вознеслся еси:/ и нас ускори к высоты духовныя восхождению,// Симеоне преподобне отче наш.
И ныне, Богородичен, глас тойже:
Вход. Прокимен дне. Чтения три:
На литии стихиры самогласны, глас 4:
Тленныя мира сего красоты убежал еси,/ будущих восприятия возжелев сокровищ,/ и в тихое пристанище притекл еси, Симеоне,/ идеже, постническое течение скончав,/ дарований божественных сокровище явился еси;/ и нам благодать от мощей твоих источи,// честное успение твое славящим.
Саровскому чудотворцу от юности подражая,/ того бо радость о Господе стяжал еси/ и к людем велию любовь явил еси, Симеоне,/ светом благочестия вся просвещая/ и подавая верным исцеления,/ темже радость духовную молитвами твоими испроси// святую память твою совершающим.
Велию подвига иноческаго ревность показуя,/ в келию пещерную затворился еси/ и тамо яко безплотен пожил еси, Симеоне,/ от духов нечистых стужения приемый,/ ныне же Ангельскаго сподобився ликостояния,/ к милосердию Божию с ними воззови// о всех, любовию тя почитающих.
Слава, глас 8:
Земли Печерския процветение,/ сторицею плод умноживый,/ дар молитвы к Богу стяжал еси,/ имже обилие плодов земных/ от земли неплодныя испросил еси,/ напитав зело обитель твою;/ о, Симеоне преславне,/ неплодствие душ наших претвори,/ да сподобимся принести Господу// достойныя плоды покаяния.
И ныне, Богородичен, глас тойже:
На стиховне стихиры, глас 5:
Подобен: Радуйся, живоносный кресте\:
Радуйся, преподобне Симеоне,/ чудес источниче неисчерпаемый,/ всем, с верою к тебе взывающим,/ был еси безмездный врач и скорый помощник,/ души недуги разрешая/ и телес болезни утоляя,/ темже и ныне честныя мощи твоя/ струи исцелений источают неоскудно:// моли Христа ниспослати нам велию милость.
Стих: Честна пред Господем/ смерть преподобных Его.
Радуйся, преподобне Симеоне,/ воздержанием плотския умертвив в себе страсти,/ власть на духи нечистыя от Бога приял еси/ и человекогубителя посрамил еси,/ егда постом, молитвою и смирением/ козни вражия разоряяй,/ души страждущия свобождал еси,/ темже моли Человеколюбца// даровати душам нашим велию милость.
Стих: Блажен муж, бояйся Господа,/ в заповедех Его восхощет зело.
Радуйся, преподобне Симеоне,/ мирен дух и сердце чисто стяжав,/ пророческаго сподобился еси дара/ и тайновидец предивный явился еси,/ премудростию Божиею озаряемь,/ многия от бед избавил еси/ и неврежденны от пагубы сохранил еси;/ и ныне моли Христа Бога// даровати душам нашим мир и велию милость.
Слава, глас 6:
Бренныя славы бегая,/ венцем нетленным увенчался еси,/ и велие дерзновение пред Богом/ смирением стяжал еси,/ Того не престанно моли, Симеоне,/ даровати нам прегрешений оставление,// во еже спастися нам.
И ныне, Богородичен, глас тойже:
На благословении хлебов, тропарь святаго, дважды, и Богородице Дево: единожды.
Тропарь, глас 1:
Любовию Христовою сердце твое уязвивый,/ евангельски Тому последовал еси:/ яко древний подвижник преподобием украсивыйся,/ славный насельник обители Богоматери у пещер Богом зданных явился еси,/ и, благодать духовную свыше приемый,/ подаеши верным исцеления,/ Симеоне богоблаженне,// не престай молитися о чтущих тя.
На Утрени
На Бог Господь: тропарь святаго, дважды.
Слава, и ныне, Богородичен гласа.
По первом стихословии седален, глас 8:
Подобен: Повеленное тайно:
Благодатию свыше осиянный, пастырь добрый явился еси, преподобне Симеоне, и, велие попечение о чадех твоих прилагаяй, духовныя ограды пажити твоея неврежденны пастырски соблюл еси, темже и нас предстательством твоим сохрани и овцам избранным Христова стада сопричастными быти, моли.
Слава, и ныне, Богородичен:
Пресвятая и Пренепорочная Дево, у Креста возлюбленнаго Сына Твоего нас сыноположши, явилася еси всем христианом Мати Преблагая, темже к Тебе, Упование наше, в скорби душевней припадаем, вопиюще: простри матерски руце Твои ко Престолу Владычню и молися, Пречистая, о душах наших.
По втором стихословии седален, глас 3:
Подобен: Дева днесь:
Во обители Пречистыя труды монашеския смиренно понесл еси, Богородицу любовию немолчно песнословя, сего ради, отче Симеоне, еще на земли сый, собеседник прелюбезен Божия Матере явился еси, ныне же, у Престола Царя славы предстоя, со Владычицею Небесною непрестай молитися о спасении душ наших.
Слава, и ныне, Богородичен:
Явилася еси в скорбех Утешение и в бедах Предстательница, Заступница еси обидимым и ненадеяным Надежда, темже Тя Упование спасения нашего по Бозе стяжавше, в молении сердечнем к Тебе припадаем и усердно молимся: Всенепорочная Дево, со угодником Твоим Симеоном, помози спастися душам нашим.
Величание:
Ублажаем тя,/ преподобне отче Симеоне,/ и чтим святую память твою,/ наставниче монахов/ и собеседниче Ангелов.
По полиелеи седален, глас 4:
Подобен: Удивися Иосиф:
Приидите, вернии, ублажим святаго Симеона, иже, высотою дел своих показався, в божественную доброту одеяся и сосуд Небесных дарований явися, от негоже богатныя милости неоскудно приемлюще, верою и любовию зовем тому: радуйся, Симеоне, преподобне отче наш.
Слава, и ныне, Богородичен:
Радуйся, Пречистая, Архангельский глас слышавшая, Слова бо неизреченнаго Вместилище и Рождества несказаннаго Мати, немовение (немоту) душ наших разреши, да устнама радости по достоянию восхвалим Тя: радуйся, Царице небеси и земли, Тобою бо всякаго зла избавляемся.
Прокимен, глас 4: Честна пред Господем смерть преподобных Его. Стих: Что воздам Господеви о всех, яже воздаде ми.
Всякое дыхание: Евангелие от Матфея, зачало 43.
По 50-ом псалме стихира, глас 6:
Днесь весенняго торжества радование/ и душам нашим весна бывает:/ новаго бо молитвенника тя пред Богом обретаем,/ преподобне отче Симеоне;/ пещера убо отверзеся,/ и гроб не удержа чудоточных мощей твоих сияние,/ имже озаришася вси вернии,/ в светоносный день прославления твоего сошедшиися,/ темже вкупе небесная и земная/ веселия всякаго исполняются,// и Господь во святых Своих прославляется.
Канон преподобному, гл. 8
Песнь 1
Ирмос: Колесницегонителя фараона погрузи, чудотворяй иногда моисейский жезл, крестообразно поразив, и разделив море, Израиля же беглеца, пешеходца спасе, песнь Богови воспевающа.
Днесь в доме Пречистыя сошедшеся, вернии, духом Божественным веселящеся, преподобнаго Симеона восхвалим, тот бо всем житием своим непрестанно песнь Богови воспевал еси.
Жизнодавцем, аки семя на ниве веры истинныя, в вертограде Пренепорочныя насажден был еси, и, яко плод добрый явился еси, множества верных напитал еси, песнь Богови воспеваяй.
Благими нравы украшен, глаголов и законов Божиих делатель быв, совесть имея благу, и око сердечное взирающее к Богу, исполнился еси, отче Симеоне, Божественных даров и чудес, песнь Богови воспеваяй.
Богородичен: Богородительнице Всенепорочная, всем верою исповедающим Тя на всяком месте и покланяющимся Твоему святому образу, моли Сына Твоего, Христа Бога нашего, избавление даровати от всегубительнаго гнева, страстей и бед, песнь Ему воспевающим.
Песнь 3
Ирмос: Утверждей в начале небеса разумом, и землю на водах основавый, на камени мя, Христе, заповедей Твоих утверди, яко несть свят, паче Тебе едине Человеколюбче.
Весь прилежа Вседержителю, преподобне отче Симеоне, Тому прилепился еси от юности, и нас верных чад твоих, научи похваляти святую Троицу: несть Свят, паче Тебе, едине Человеколюбче.
Любовию Божественною укрепляем, отче наш Симеоне, чудотворцу Саровскому последуя, бесовския злобы избегл еси; и ныне вкупе с ним и всеми святыми воспеваеши: несть Свят, паче Тебе, едине Человеколюбче.
Страсти плотския умертвляя, отче Симеоне, душу обогатил еси Божественными дарованьми, и сими уврачевал еси болезней множество, с верою призывающих: несть Свят, паче Тебе, едине Человеколюбче.
Богородичен: К Тебе, Богородице Всепетая, прилежно притецем, недостойная чада Твоя, грешнии и смиреннии, и припадем, в покаянии зовуще из глубины души: Владычице, помози; и молитвами Твоего угодника преподобнаго Симеона, сотвори спастися нам, вопиющим: несть Свят, паче Тебе, едине Человеколюбче.
Седален, глас 4
Страстей умерщвляя волчцы, и горшая поработив лучшему, отче Симеоне преславне, душу твою, яко землю доброплодную, являя, семя Истины приял еси и потом многих болезней и трудов обильно орошая, процвел еси, яко крин райский, красоту Божественную прославляя; сего ради тя величаем.
Слава, и ныне, Богородичен:
Молю Тя, Пречистая Мати Бога Вышняго, едино души моея утешение, упование, сладосте, Божественный покрове, свете, заступление и спасение! Сподоби мя Твоими молитвами услышати глас, благословенных призывающий внутрь чертога Владыки.
Песнь 4
Ирмос: Ты моя крепость Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив. Тем с пророком Аввакумом зову Ти: силе Твоей слава, Человеколюбче.
Душу свою очистив, преподобне отче Симеоне, храм Святаго Духа ю соделал еси, в подвизех добре подвизаясь, горнее царство наследовал еси, со всеми преподобными вселися. Сего ради вопием: силе Твоей слава, Человеколюбче.
Будущее твое прозрев, отче Симеоне, блаженный Корнилий Крыпецкий, манной Божественных словес тя питая, постави на пажить духовную. Ты же познав сию сладость, радостно вопиял еси: силе Твоей слава, Человеколюбче.
Многоболезненными страстьми одержимым, отче пречудне Симеоне, даровал еси исцеления силою благодати Христовой, юже стяжал еси изрядными делы твои. Темже с тобою вопием: силе Твоей слава, Человеколюбче.
Богородичен: О Пресвятая Владычице, всех праведных удобрение, и дворе словесных овец, во уделе Печерстем боголюбиваго Симеона под честным Твоим омофором взрастившая и воспитавшая, не остави и нас, рабов Твоих. Умоли Сына Твоего и Бога нашего, да спасет души наша.
Песнь 5
Ирмос: Вскую мя отринул еси, от лица Твоего Свете незаходимый, и покры мя чуждая тма окаяннаго; но обрати мя и к свету заповедей Твоих пути моя направи, молюся.
Светом незаходимым осияваем, отче пресветле Симеоне, возсиял еси на земли яко солнце, чада твоя к познанию Истины провождая и к свету заповедей Христовых пути тех направляя.
В стадо овец духовных преподобномученика Корнилия пришел еси, отче наш Симеоне, и вся своя отвергнув, добродетельми твоими возшел еси на небо, взывая к Богу: якоже Илии на колеснице, тако и моя пути направи, молюся.
Ныне в вышних селениих обитая, чад твоих назираеши, преподобне отче Симеоне, Богоприятными твоими молитвами. Научи и нас взывати Господу: к свету заповедей Твоих пути наша направи, молимся.
Богородичен: Радуйся, Дево Всечестная, мосте, к небесем преводяй, и лествице высокая, ко Христу нас возводящая. Темже Всепетая, яко матернее дерзновение к Нему имущая, исцели недугующаго ума моего омрачение, и пути моя ко Христу направи, молюся.
Песнь 6
Ирмос: Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.
Умом очищенным от помышлений лукавых, блаженне отче Симеоне, в молитве непрестанной весь быв, яко светильник горя, взывал еси ко Господу: из глубины зол возведи мя, Боже спасения моего.
Обновив послушанием Христу душу твою, отче священне Симеоне, богомудрым промыслом направляем, вся презрев в великий образ облеклся еси, и в пещеру Лазаря прозорливца вселився, тому подражал еси, взывая: услыши мя, Боже спасения моего.
Крепостию духа, отче Симеоне, превозмогая державу вражию, подвизался еси войти сквозь тесныя врата, в селения Авраама, Исаака и Иакова, и всех пророк царствия Господа нашего, Тому со умилением взывая: слава Тебе, Боже спасения моего.
Богородичен: Не престай ходатайствовати о нас, рабех Твоих, Пречистая, якоже Господь с Тобою быти изволи, и от бед и скорбей избави ны, молящихся Сыну Твоему и воспевающих славу Бога спасения нашего.
Кондак, глас 6:
Яко Божия любве зерцало,/ во обители Печерстей благодатно просветился еси,/ образ иноческаго жития показуя,/ трудолюбием и послушанием/ на высоту добродетелей востекл еси,/ темже, дары Духа Святаго от Господа почтенный,/ чудеса многа щедро источаеши,/ преподобне отче наш Симеоне,// помози спастися душам нашим.
Икос
Духа Святаго сиянием просвещся,/ вся, яже в мире необинуяся оставил еси, блаженне,/ многими труды плоть покоривый духу,/ к высоте достигл еси безстрастия,/ сице, благоплодие души твоея добродетелей деянием являяй,/ истинную любовь к людем стяжал еси/ и благодать целений от Бога приял еси,/ темже и по преставлении твоем дары чудес обогащенный,/ помощию твоею нас не оставляеши,/ преподобне отче наш Симеоне,// помози спастися душам нашим.
Песнь 7
Ирмос: Божия снисхождения огнь устыдеся в Вавилоне иногда, сего ради отроцы в пещи радованною ногою, яко во цветнице ликующе, пояху: благословен еси Боже отец наших.
Хлебом насущным питая, отче наш Симеоне, алчущих и жаждущих пищи духовныя, истинный пастырь явился еси словесных овец, сам почерпая сия у Жизнодавца Христа, Емуже зовеши: благословен Бог отец наших.
Краснейшее прозябение, преподобне отче Симеоне, в дому Божии прозябл еси, в молитвах болезнуя о чадех своих, ихже Пречистая тебе вручи, познал еси Единаго Бога, и посланнаго Им Иисуса Христа, Тому радуяся, поеши: благословен еси Боже отец наших.
С небесными лики предстоиши, богоблаженне отче Симеоне, престолу Пресвятыя Троицы, с ними купно и со всеми святыми непрестанно воспевая: благословен еси Боже отец наших.
Богородичен: Кому возопию, Владычице, аще не к Тебе, Заступнице усердной рода христианскаго, Ты бо Отроча рождши Пребезначальнаго Слова, обетшавшия ны грехом, обновила еси и пети укрепила еси: отец наших Боже благословен еси.
Песнь 8
Ирмос: Седмерицею пещь халдейский мучитель богочестивым неистовно разжже, силою же лучшею спасены сия видев, Творцу и избавителю вопияше: отроцы благословите, священницы воспойте, людие превозносите во вся веки.
Облекитеся ныне людие, чтущии память Симеона достохвальнаго, в милосердие, благость, смиренномудрие, кротость, долготерпение, снисхождение, уподобивше Христу, Егоже отроцы благословите, священницы воспойте, людие превозносите во вся веки.
Житием твоим, преподобне отче Симеоне, нищеты духовныя богатно достигл еси, образ монахов, и всех приходящих к ти боговидный учитель любве Христовой, Егоже пойте, благословите и превозносите во вся веки.
Троичен: Троицу Единосущную, Нераздельную, Неслиянную и Пребезначальную днесь вернии почтим, Еяже отроцы благословите, священницы воспойте, людие превозносите во вся веки.
Богородичен: Источник неисчерпаемый воды животныя, Пренепорочная, от потопа греховнаго мир спасшая. Море, потопившее фараона мысленнаго, темже и страсти души моея потопи и росою благодати Твоея окропи, и прохлади сердце мое острупленное грехми, да благословят Тя вси роди, поют и превозносят во вся веки.
Песнь 9
Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу ангелов и человек чиноначалия величают.
Преподобне отче Симеоне, яко истинный пастырь овец Христовых, ныне дерзновение имея ко Господу, назираеши стадо свое с горних высот, упаси же и нас во ограду небесную, идеже есть Великий Пастырь.
Преселился еси, отче наш Симеоне, от привременныя жизни, песнь воспевая в вышних, со отцы святыми радуяся, и нас с верою и любовию тебе поющих, от великих бед и скорбей избавити Христа умоляй, Его непрестанно величающих.
О богоблаженне отче наш Симеоне, в жизни временней на земли не покорився страстем плоти, безстрастием, яко в ризу тайну, преподобне, облеклся еси и сожителем ангелов явився, умоли Христа Бога избавити нас от искушений.
Богородичен: Христа умоли, Твое Рождение, Мати Дево, согрешений прощение даровати рабом Твоим, Тебе Богородицу проповедавшим воистину, и светлости святых и веселия сподоби нас во Царствии Твоем.
Светилен:
Днесь светло празднует святая обитель твоя,/ юже озарил еси, яко звезда многосветлая,/ добродетельными зарями, отче Симеоне,/ честное житие твое,// еже есть нам ко Христу просвещение.
Слава, и ныне, Богородичен:
Пети Тебе сподоби, Купино Неопалимая,/ ибо Свет Невечерний от чрева Твоего возсия,/ мрак души моея озари, Дево Всесвятая,// и прогони мглу страстей моих, едина Всепетая.
На хвалитех стихиры на 4, глас 8:
Подобен: О преславнаго чудесе:
О, богомудре Симеоне,/ от юности святым отцем подобяся,/ во бдениих, молитвах и постех/ труды с болезньми подъял еси,/ ангельским житием украсивыйся/ и демонския полки устрашивый,/ муж совершен воистину явился еси,/ и ко святым Печерским причтен был еси,// с нимиже за ны Христа Бога молиши.
О, предивне Симеоне,/ веры несумненныя стяжателю,/ исцелений божественных/ сосуд тя знаем неиждиваемый,/ чудесы от Бога прославляемь/ и от верных песньми восхваляемь,/ молитвенник теплый днесь возсиял еси,/ темже Престолу Христову предстоя,// моли, даровати нам богатыя милости.
О, преблаженне Симеоне,/ винограда Христова прилежный делателю,/ яко отец чадолюбивый,/ тяготу дневную понесл еси,/ молитвою чад твоих ограждая/ и любовию души тех возгревая,/ был еси всем ко Господу путевождь,/ темже монахов и мирских множество// наставника тя непреложна почитает.
Слава, глас 8:
Чудес зарею облистаемый/ ныне явился еси, преподобне,/ Церкве Русския украшение,/ обители Псково-Печерския торжество:/ монахов ликовствующее пение/ и верных веселия гласы:/ о, Симеоне,/ тезоимените услышания ны Господом,/ моления наша Ему донеси,// усерднаго бо тя ходатая пред Богом имамы.
И ныне, Богородичен, глас тойже:
Славословие великое. И отпуст.
Литургия
Блаженны от канона праздника, песнь 6-я на 4 и святаго песнь 6-я на 4. Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Коринфяном, зачало 176.Аллилуия, глас 6: Блажен муж, бояйся Господа,/ в заповедех его восхощет зело. Стих: Сильно на земли будет семя его.Евангелие от Луки, зачало 24. Причастен: В память вечную будет праведник от слуха зла не убоится. Аллилуия (3 раза).
 
Тропарь: 

 

 

Тропарь, глас 1:

Любовию Христовою сердце твое уязвивый, евангельски Тому последовал еси: яко древний подвижник преподобием украсивыйся, славный насельник обители Богоматери у пещер Богом зданных явился еси, и, благодать духовную свыше приемый, подаеши верным исцеления, Симеоне богоблаженне, не престай молитися о чтущих тя.

Кондак: 

 

 

Кондак, глас 4:

Яко Божия любве зерцало, во обители Печерстей благодатно просветился еси, образ иноческаго жития показуя, трудолюбием и послушанием на высоту добродетелей востекл еси, темже, дары Духа Святаго от Господа почтенный, чудеса многа щедро источаеши, преподобне отче наш Симеоне, помози спастися душам нашим.

Молитва: 

 

 

МОЛИТВА

О, всечестный и богоблаженный отче наш Симеоне! Приими ныне тебе с любовию и верою прилежно молящихся и сохрани нас от всякаго зла, дана бо тебе от Бога велия благодать: недужныя исцеляти, скорбящия утешати, в беду впавшия свобождати. Ты бо аще и миру себе умертвил еси, но, любовь Христову к людем являяй, нечужд их нуждам показался еси. Темже молим тя, буди нам заступник от враг спасения нашего, души наша, грехом уловленныя, к истинному покаянию приведи, телес наших болезни уврачуй, юныя благочестию научи, старыя поддержи, сирых и обездоленных препитай. Обитель убо твою, в нейже усердно многая лета подвизался еси, в мирном благоустроении и благолепии сохрани, и вся, яже монашествующия и добре труждающияся, во благих желаниих утверди и в подвизех иноческих укрепи. Ей, святый отче, испроси нам у Премилостиваго Спаса коемуждо ко спасению благопотребная, да исправивше житие наше, от части шуия отлученни будем и вечное спасение во Царствии Небеснем молитвами твоими улучим, идеже с тобою и всеми святыми сподобимся прославляти в Троице славимаго Бога, Отца и Сына и Святаго Духа, ныне и присно, и во веки веков. Аминь.

Акафист: 
 

 

Акафист преподобному Симеону 
 

Кондак 1

Избраннный подвижниче иноческаго делания/ и молитвенниче о нас изрядный,/ преподобне отче наш Симеоне,/ равноангельному житию от юности твоея возревновал еси/ и, во обитель Печерскую вселивыйся,/ в простоте и смирении евангельски подвизался еси,/ темже, обилием благодати от Господа исполненный,/ от всяких бед и скорбей свободи поющих ти:
Радуйся, преподобне Симеоне, Псково-Печерский чудотворче.

Икос 1

Ангельския чистоты стяжателю, отче Симеоне, подвигом монашеским добре украсивыйся, райския сладости причастник явился еси, темже и обитель твоя, в нейже Пресвятую Богородицу в молитвах боголепно воспевал еси, ныне о тебе красуется, приносящи ти таковая:
Радуйся, нравы ангельскими издетска украшенный;
Радуйся, обычаи благими зело удобренный.
Радуйся, путь Христов от юности возлюбивый;
Радуйся, чистоту телесную Тому сохранивый.
Радуйся, кротостию и смирением сердце твое умягчивый; 
Радуйся, у пещер Богом зданных добродетельми просвещенный.
Радуйся, иноческаго жития богомудрый наставниче;
Радуйся, о всех к тебе взывающих теплый молитвенниче.
Радуйся, преподобне Симеоне, Псково-Печерский чудотворче.

Кондак 2

Видя душу твою, издетска подвига желанием Христа ради исполненну, Подвигоположник Господь воспламени ю ко иноческому житию стремлением; ты же, блаженне Симеоне, отрок сый, преподобному Серафиму Саровскому в усердии отай подражал еси, чистыми усты в умилении вознося Богу: Аллилуиа.

Икос 2

Разумея вся преходящая мира дольняго, ум свой к горнему восперил еси, и, вся житейская и суетная любве ради ко Господу оставивый, во обитель древнюю Псково-Печерскую, юже измлада зело возлюби, яко к тихому пристанищу притекл еси, да Богу единому поживеши. Сего ради, избранниче Божий, приими от сердца тебе приносимая:
Радуйся, к подвижничеству сердце твое склонивый;
Радуйся, всего себе воли Божией покоривый.
Радуйся, яко молитве и послушанию издетска навыкл еси;
Радуйся, яко во отрочестве старец велий наречен был еси.
Радуйся, мирския сладости яко огня бежавый;
Радуйся, монашескаго жития узкий путь избравый.
Радуйся, воздержанием благоукрашенный;
Радуйся, Духа Святаго благодатию осиянный.
Радуйся, преподобне Симеоне, Псково-Печерский чудотворче.

Кондак 3

Силою божественною укрепляемый, отче Симеоне, в послушании ко игумену и братии кротко и смиренно душу твою хранил еси, празднословия всякаго удаляяся, и, труды к трудом неленостно прилагая, чина монашескаго достойна быти показался еси, в подвизех духовных всегда поя Богу: Аллилуиа.

Икос 3

Имея ум свой к Богу вознесенный, от силы в силу восходил еси, отче Симеоне, и, благодать священства восприим, молитвою и постом по чреслем препоясався, яко раб благий, во всяцем деле духом твоим бодрствовал еси, единаго ко спасению взыскуя. Мы же, таковую ревность твою прославляюще, приносим ти сицевая:
Радуйся, благоуветием и незлобием исполненный;
Радуйся, в братолюбии делателю прилежный.
Радуйся, чина ангельскаго достойный носителю;
Радуйся, обетов иноческих непреложный рачителю.
Радуйся, во трудех неленостный послушниче;
Радуйся, пред очима Господа усердный постниче.
Радуйся, целомудрия и чистоты хранителю;
Радуйся, нивы Христовы изрядный возделывателю.
Радуйся, преподобне Симеоне, Псково-Печерский чудотворче.

Кондак 4

Бурю страстей воздержанием и любовию ко Христу умертвив, вящшаго подвига возжелел еси, богоблаженне Симеоне, темже, кротко пред владыкою представ, иже тя наместника обители видети желаше, по смирению сего отреклся еси, и, схимою облекийся, в келию пещерную водворился еси, да тамо уединенно вопиеши Богу: Аллилуиа.

Икос 4

Слышавше молитвы твоя, преподобне Симеоне, яже к Богу от сердца возносимыя, полчища бесовстии зело стужаху ти, устрашити и изгнати тя хотяще, ты же, яко воин Царя Небеснаго, силою креста Господня сатанину детель отражал еси, подвиги твоя усугубляя. Отжени и от нас, отче благодатне, всякаго врага и супостата, да поем тебе сице:
Радуйся, в схиму, яко в броню ратную облекийся;
Радуйся, молитвою, яко воин мечем вооруживыйся.
Радуйся, постом и воздержанием плоть духови покоривый;
Радуйся, иго Христово, яко благо, на ся подъявый.
Радуйся, демонов твердый устрашителю;
Радуйся, бесовских прилогов разорителю.
Радуйся, воины русския от враг в пещерах сокрывый;
Радуйся, молитвенным стоянием от погубления обитель избавивый.
Радуйся, преподобне Симеоне, Псково-Печерский чудотворче.

Кондак 5

Богоблагодатна старца показа тя всемилостивый Господь верным, во святей обители яко крин сельный процветшаго; ты бо, отче Симеоне, чудес многих сосуде преизливаемый, вся скорбящия и страждущия любовию о Христе Господе утешал еси, призывая единомысленно пети всех Творцу: Аллилуиа.

Икос 5

Видяще тя людие, пастыря добраго и крепкаго пред Богом молитвенника, дары Духа Святаго преисполненна, во множестве прихождаху к ти, в болезнех и скорбех изнемогающии, в ожесточении сущии и страждущии от дух нечистых, и, по прошению своему приемлюще, благодарственно тебе взываху:
Радуйся, любовь неложную ко всем явивый;
Радуйся, милосердию Христову подражавый.
Радуйся, пастырю добрый и любвеобильный;
Радуйся, отче, к страждущим благосердный.
Радуйся, о земли неплодной втайне нощию молитву творивый;
Радуйся, темже неплодие тоя в велие плодоносие претворивый.
Радуйся, чистым сердцем дар прозрения от Господа стяжавый;
Радуйся, игумена обители патриаршество предзревый.
Радуйся, преподобне Симеоне, Псково-Печерский чудотворче.

Кондак 6

Проповедник милосердия христианскаго воистинну показался еси, преподобне Симеоне, и, образ быв честнаго иночества, радостию о Господе исполненный мирен дух и велию любовь к творению Его стяжал еси, еже есть радоватися с радующимися и плакати с плачущими. Сего ради братолюбие твое поминающе, вознесем Богу: Аллилуиа.

Икос 6

Возсиял еси во обители Печерстей яко светильник лучезарный, богомудре Симеоне, любовию нелицемерною души отчаянныя на путь ко Христу возставляяй, верою несумненною грехми помраченныя ко дверем покаяния приводяй и надеждою неизсякаемою благое терпение в напастех подаваяй. Мы же, молитвами твоими сохраняеми, ублажаем тя тако:
Радуйся, грешных пред Богом ходатаю;
Радуйся, Слова Божия в сердца наша сеятелю.
Радуйся, отчаянныя от смерти вольныя отвращаяй;
Радуйся, верныя от напрасныя смерти спасаяй.
Радуйся, страждущим тепле сострадавый;
Радуйся, от бесов стужаемыя именем Христовым свобождавый.
Радуйся, от напастей предлежащих скорый избавителю;
Радуйся, благочестия верных мудрый учителю.
Радуйся, преподобне Симеоне, Псково-Печерский чудотворче.

Кондак 7

Хотяй от единаго Бога милости снискати, предивне Симеоне, людския славы смиренно удалялся еси, благодать дарованную ти от Господа таяй, и тако в труде неустаннем на служение ближним и обители твоей по вся дни до скончания благоплодно подвизался еси, за вся славя и вознося Богу: Аллилуиа.

Икос 7

Новую купель Силоамскую в земли Печерстей, явльшуюся по неизреченней милости Божией, вернии обретоша, ибо благодатию, по вере ти данною, чудеса евангельская творил еси, отче Симеоне, егда жены кровоточивыя от лет многих ток уставил еси и отроку ушеса и уста затворенныя отверзл еси. Мы же, имя Христово о толиком зело прославляюще, восхваляем тя глаголы таковыми:
Радуйся, Божия благодати смиренный таинниче;
Радуйся, судеб Божиих пречудный тайновидче.
Радуйся, сокровенная человеков яко в книзе зревый;
Радуйся, многия души человеческия ко Господу приведый.
Радуйся, разслабленныя здравы сотворяяй;
Радуйся, глазами болезнующия исцеляяй.
Радуйся, руце и нозе недужныя укрепляяй;
Радуйся, удрученныя от зубныя болезни свобождаяй.
Радуйся, преподобне Симеоне, Псково-Печерский чудотворче.

Кондак 8

Странное и предивное чудо Небесныя благодати видим о тебе, отче Симеоне, егда приближися время отшествия твоего, всю надежду на милость Божию и заступление Пречистыя Владычицы возложивый, яве Богородицу зрети сподобился еси, тебе рекшую: угодниче Мой, скоро возму тя. Темже, тихою радостию о Господе исполняяся, вознесл еси Ему: Аллилуиа.

Икос 8

Весь быв образ послушания, якоже в житии твоем, тако и в преставлении ко Господу, богоблаженне Симеоне, егда час кончины твоея, духовно тобою провиденный, по прошению игумена, яко верный послушник, отложил еси, да не в праздник великий погребение твое случится. Мы же, дивящеся таковому послушанию твоему, с любовию тепле глаголем ти:
Радуйся, в послушание Христоподражательное неуклонно себе вдавый;
Радуйся, смиренномудрия истинный образ явивый.
Радуйся, Царицу Небесную немолчно славивый;
Радуйся, заступление Тоя себе стяжавый.
Радуйся, со Христом быти присно возжелевый;
Радуйся, плачем покаянным яко банею себе омывый.
Радуйся, чадолюбче, о стаде твоем без устали пекийся;
Радуйся, и по смерти попечением твоим ны не оставляяй.
Радуйся, преподобне Симеоне, Псково-Печерский чудотворче.

Кондак 9

Всего себе на служение Богу и людем предал еси, святче Божий, сего ради, на одре предсмертнем немощствуяй, последняя наставления, утешения и благословения, во еже любовь имети между собою, от пастырскаго сердца чадом твоим преподал еси, и тако, в мире от земных почив, в Небесныя обители блаженно преселился еси; ныне же со Ангелы вопиеши Богу: Аллилуиа.

Икос 9

Витии человечестии недоумеют како исповести день пречуднаго погребения твоего, достославне Симеоне, егда от всякия веси и грады чада твоя духовная во обитель Печерскую абие собрани быша дивно, но и, по смерти тя суща жива чтуще, приношаху ти словеса таковая:
Радуйся, звездо, путь живота честнаго нам указующая;
Радуйся, зарю, верою твоею души наша пробуждающая.
Радуйся, свете, любовию Христовою нас озаряяй;
Радуйся, лучу, мрак греховный покаянием разсеяваяй.
Радуйся, реко исцелений тихоструйная;
Радуйся, лампадо в молитвах о нас неугасимая.
Радуйся, сосуде даров благодатных неиждиваемый;
Радуйся, цвете благоухания Небеснаго исполненный.
Радуйся, преподобне Симеоне, Псково-Печерский чудотворче.

Кондак 10

Спасения ради вечнаго души твоея, отче Симеоне, труды многи и болезни в терпении кротко понесл еси, о себе ничесоже когда возомнив, обаче, пред всеми ся умаляяй, в дерзновении пред Богом велик явился еси. Темже, славою увенчанный, в радость Господа вшел еси, и нас не остави молитвами твоими, да сподобимся с тобою купно воспети Богу: Аллилуиа.

Икос 10

Стена ограждающая от всякаго зла был еси нам, отче Симеоне, и по смерти, якоже обещался еси, ны не оставляеши твоим заступлением и всем, с верою к тебе прибегающим, помощь неоскудную в многоцелебных мощех твоих подаеши. Тебе же, яко мощному о нас молитвеннику у Престола Всевышняго, хвалебная приносим:
Радуйся, тяготы чад твоих на себе понесый;
Радуйся, истинную любовь ко ближнему нам показуяй.
Радуйся, к тебе взывающих скорое услышание;
Радуйся, в печалех сущих присное утешение.
Радуйся, в помощи к нам неоскудеваяй;
Радуйся, в прошениих наших пред Богом ходатайствуяй.
Радуйся, чудесы многи от Господа прославленный;
Радуйся, подвижниче дарованьми благими исполненный.
Радуйся, преподобне Симеоне, Псково-Печерский чудотворче.

Кондак 11

Пение всеумиленное приносим у раки мощей твоих, угодниче Божий Симеоне, во всяцей скорби и немощи человечестей к тебе прибегающе, яко воистинну вемы тя крепкаго в бедах помощника и теплаго ходатая за ны пред Господом, да, идеже ты еси, и нас быти сподоби молитвами твоими, взывающих к Богу: Аллилуиа.

Икос 11

Светло празднует Печерская обитель честную память твою, преподобне Симеоне, и, божественную благодать в цельботочных мощех твоих видяще, Бога дивнаго во святых Своих прославляет, и тебе, яко благому предстателю, радостне взывает:
Радуйся, яко во обители у пещер Богом зданных зело потрудился еси; 
Радуйся, яко со святыми отцы Печерскими прославился еси.
Радуйся, монашествующих духовное радование;
Радуйся, верных присное веселие.
Радуйся, яко нестяжанием тленнаго души нетление обрел еси;
Радуйся, яко от мира преходящаго во обители вечныя преселился еси.
Радуйся, николиже тебе просящия помощию оставляяй;
Радуйся, и доныне благодатными дары чудодействуяй.
Радуйся, преподобне Симеоне, Псково-Печерский чудотворче.

Кондак 12

Благодать Божия, от честных мощей твоих обилием чудес преизливающаяся, днесь собра вся верныя, любовию тя почитающия и смиренным сердцем в молении к тебе припадающия, и тя усердно просящия: души наша к покаянию приведи, телеса недужная исцели и всех нас молитвами твоими от всяких бед сохрани, да велегласно воспоем Богу: Аллилуиа.

Икос 12

Поюще дивное твое житие, преподобне отче Симеоне, ублажаем труды твоя, в нихже неленостно по вся дни во обители подвизался еси, славим кротость и смирение твое, имиже Христу Богу подражал еси, превозносим любовь твою, еюже ближнему в нуждах добре послужил еси и величаем тя песнопеньми таковыми:
Радуйся, милостиве, Богом помилованный;
Радуйся, целомудре, от Христа славою увенчанный.
Радуйся, кротче, рай Небесный наследивый;
Радуйся, трудниче, покой блаженный обретый.
Радуйся, молитвенниче, со Ангелы жительствуяй;
Радуйся, постниче, благами вечными наслаждаяйся.
Радуйся, незлобиве, Бога зрети сподобивыйся;
Радуйся, боголюбче, Господом возлюбленный.
Радуйся, преподобне Симеоне, Псково-Печерский чудотворче.

Кондак 13

О, святый угодниче Божий, преподобне и богоносне отче наш Симеоне! Тебе молебно предстоящих не презри, но твоим мощным о нас заступлением помози богоугодно на земли пожити, да, очистившеся от всякия скверны, невечерний достигнем покой, идеже с тобою вкупе Всемилостивому и Человеколюбцу Богу воспоем ангельскую песнь: Аллилуиа, аллилуиа, аллилуиа.

Сей кондак чтется трижды, затем Икос 1 и Кондак 1.