Храм Новомучеников и Исповедников Российских в Строгино

Сентября в 19-й день
Служба священномученику Константину Богородскому
НА ВЕЛИЦЕЙ ВЕЧЕРНИ
Блажен муж: 1-й антифон.
На Господи, воззвах: стихиры святаго на 8, глас 4.
Подобен: Дал еси знамение:
Беззаконных шатания / и демонская служения / в страданиих твердостию, Константине, низложил еси, / Спаса всех ясно возвещая / и верных просвещая мысли, богоблаженне, / и мрак отгоняя идольскаго суетства словесы твоими / и подвигов светлостию.
Образ пастыря добраго был еси, священномучениче блаженне, / о стаде Христове попечение неленостно имый, / Богородския земли похвало и Российския земли утверждение, / и всея вселенныя удобрение. / Темже сердцем и усты тя, священномучениче Константине, ублажаем / и радующеся вопием: / слава Божию еже о нас смотрению.
Крест Господень взем, священномучениче Константине, / истинно последовал еси Христу, / нас ради на кресте распеншемуся, / и Его ради любве вся земная и тленная оставил еси, / и Того Единаго возлюбил еси. / Егоже моли спастися нам.
Священномучениче отче Константине, / вельми тя Христос прослави / и дарова тебе слово Божественнаго разума, / имже отсекл еси лжу от истины / и исторгл еси плевелы неверия, / и научил еси славити Троицу Единосущную, / покланяемаго в Триех Ипостасех Единаго Бога. / Того убо моли, священномучениче, / даровати просящим исцеление, мир и велию милость.
Кую похвалу принесем ти, святе Константине? / Яко цвет благоуханен Церкви Христове явился еси, / неустанно бо учил еси люди познанию веры Христовы, / грешников приводя к покаянию, / тайная человеческаго сердца ведый, / и будущая яко настоящая зрел еси, / и чада твоя вся подвигнул еси терпети за Имя Христово, / темже молитвами твоими, блаженне, дарует Спас наш верным велию милость.
Светло ликует ныне страна Российская, / прославляющи святую память твою, / отче Константине, / тя бо новаго молитвенника сия обрете / и теплаго предстателя у Престола Божия, / скораго в бедах заступника и немощным врача безмезднаго. / Слава Даровавшему ти благодать исцелений, / слава Прославльшему тя, / слава Прославляющему тобою Святую Церковь Свою.
Добродетельми просвещаяся, благочестием украшаемь, пресвитер Божественный был еси, / и яко многосветлое солнце, мир протекл еси, / насевая всюду веры проповедание, / раскол же искореняя серпом твоего языка, / пресвитере богомудре, великопроповедателю Константине.
Благовернаго князя Константина имя носил еси / и, его житию последуя, / благоверия лучами просвещая град Богородск и ересей тьму отгоняя, / миру благое украшение, / огнепальные стрелы демонския попрал еси, / и превыше всякия добродетели быв, / соводворяешися во Царствии Небеснем с горними чины: / с ними молися о нас Христу Богу, святе Константине.
Слава, глас 8:
Приидите, архиереи, священницы и христоименитии людие, / со страхом и трепетом / предстанем раце мощей новаго мученика Константина, / твердаго исполнителя поста и молитвы, / строгаго хранителя церковных преданий, / истиннаго проповедника Божественнаго Евангелия, / вернаго пастыря стада Христова, / христианского благочестия истиннаго ревнителя, / ересей и расколов искоренителя, / безбожия грознаго обличителя, / на свещнице церковнем верою и любовию горящаго, / согревающаго вся притекающия к раце мощей его / и указующаго путь иже ко спасению душ наших.
И ныне, глас тойже:
Царь Небесный / за человеколюбие на земли явися / и с человеки поживе: / от Девы бо Чистыя плоть приемый / и из Нея прошедый с восприятием, / един есть Сын, сугуб естеством, но не Ипостасию. / Темже совершенна Того Бога / и совершенна человека воистинну проповедающе, / исповедуем Христа Бога нашего; / Егоже моли, Мати Безневестная, / помиловатися душам нашим.
Вход. Прокимен дне. Чтения три мученическая.
Пророчества Исаиина чтение (глава 43):
Тако глаголет Господь: / вси языцы собрашася вкупе, и соберутся князи от них, кто возвестит сия в них? / Или яже от начала, кто слышана сотворит вам? / Да приведут свидетели своя и оправдятся, / и да услышат, и да рекут истину. / Будите Ми свидетели, и Аз Свидетель, глаголет Господь Бог, / и отрок, егоже избрах. / Да познаете и веруете Ми, и разумеете, яко Аз есмь: прежде Мене не бысть ин бог / и по Мне не будет. / Аз есмь Бог и несть, разве Мене, спасаяй, / Аз возвестих и спасох, / уничижих и не бе в вас чуждий. / Вы Мне свидетели, и Аз Господь Бог, / и еще от начала Аз есмь, / и несть от рук Моих избавляяй. / Сотворю, и кто отвратит то? / Сице глаголет Господь Бог, / избавляяй вас Святый Израилев.
Премудрости Соломоновы чтение (глава 3):
Праведных души в руце Божией, / и не прикоснется их мука. / Непщевани быша во очесех безумных умрети, / и вменися озлобление исход их: и еже от нас шествие сокрушение, / они же суть в мире. / Ибо пред лицем человеческим, аще и муку приимут, / упование их безсмертия исполнено. / И вмале наказани бывше, великими благодетельствовани будут, / яко Бог искуси я и обрете их достойны Себе. / Яко злато в горниле, искуси их, / и яко всеплодие жертвенное прият я. / И во время посещения их возсияют / и яко искры по стеблию потекут. / Судят языком и обладают людьми, / и воцарится Господь в них во веки. / Надеющиися Нань разумеют истину, / и вернии в любви пребудут Ему. / Яко благодать и милость в преподобных Его, / и посещение во избранных Его.
Премудрости Соломоновы чтение (глава 4):
Праведник аще постигнет скончатися, в покои будет. / Старость во честна не многодетна, / ниже в числе лет исчитается. седина же есть мудрость человеком, / и возраст старости житие нескверное. / Благоугоден Богови быв, возлюблен бысть / и живый посреде грешник преставлен бысть. / Восхищен бысть, да не злоба изменит разума его / или лесть прельстит душу его. / Рачение бо злобы помрачает добрая / и парение похоти пременяет ум незлобив, / Скончався вмале, исполни лета долга, / угодна бо бе Господеви душа его, / сего ради потщася от среды лукавствия. / Людие же видевше, и не разумевше, / ниже положше в помышлении таковое, / яко благодать и милость в преподобных Его / и посещение во избранных Его.
На литии стихиры, глас 5:
Возсиял еси, яко звезда лучезарная, / и в Церкви Российстей светом Христова учения / ревностию твоею о славе Божией, достохвальне, / тьму нечестия разгнал еси / и еретичествующих посрамил еси лукавое мудрование, / проповедию твоею славною обращая заблуждших ко спасению, / в темнице заключенным бываяй утешение, / чадом тебе от Господа вверенным охранение и защищение; / мы же недостойнии, не могуще добродетели и подвиги твоя изчести, / умильно вопием тебе: / досточудне отче Константине, спасай нас молитвами твоими.
Стих: Праведник, яко финикс, процветет, / яко кедр, иже в Ливане, умножится.
Кровию мученическою обагрив твою священную одежду, / вшел еси во святая святых, / Константине славне, / и ныне наслаждаешися обожения, / добродетельми украшаемь и мучением сияя, / и ангел показуяся чистейшими причащении. / Тем тя почитаем и любовию празднуем / твое священнейшее торжество, достоблаженне.
Стих: Насаждени в дому Господни / во дворех Бога нашего процветут.
Блаженне и чудне, / мужу желаний Господних / и заповедей Его ревнителю, / святе Константине, / молися о присно воспевающих тя.
Слава, глас 6:
В Церковь Небесную / священно вшел еси, / священно обливаемь, блаженне, кровию, / и Троице предстоиши, / богатно сияя нам блистании истекающими, пребогате, / темже днесь, священномучениче, / твою память совершающе, / чувствия души просвещаем.
И ныне, глас тойже:
Тучами Духа Пресвятаго, Пречистая, / мою мысль ороси, / яже каплю рождшая Христа, / неизчетно безмерная беззакония человеком щедротами измывшую: / изсуши источник страстей моих / и сподоби мя пищи животныя присно / молитвами Твоими.
На стиховне стихиры, глас 6:
Сущих во тьме и сени смертней / премудрый просветитель, о спасении людей, / в пучине греховней потопляемых, / благостный попечитель, / не ведущих Бога и окамененных сердцем к покаянию побуждаяй, / сердец строптивых и злонравных благостное умягчение, / ленивых и коснеющих совестию милостивое обличение, / слова Божия и правды Его проповедник неустрашимый, / житием благонравным козни духов злобы поднебесных победивый ты еси, Константине, / земли Российския молитвенниче предивный.
Стих: Священницы Твои облекутся в правду, / и преподобнии Твои возрадуются.
Сеятелю правды, / слезами твоими землю нашу освятивый, / обличителю неправды, души верных / от прелести греховныя свободивый, / свете сердец кротких и разумных, / путь к Богу указуяй, ученьми твоими, / яко кормилица кроткая, / нас греяй и питаяй, и греховное злосмрадие потребляяй, / молися о нас, отче Константине.
Стих: Блажен муж, бояйся Господа, / в заповедех Его восхоти зело.
Силою благодати, яже в тебе, / немощнии духом в любви Божией укрепляются / и твоими молитвами кающиися плена греховнаго свобождаются, / труды твоими алчущии и жаждущии правды Христовы насыщаются, / благовестием твоим врази Церкве посрамляются, / молитвами твоими силы ада низлагаются, / воздеянием рук твоих врата небесная верным отверзаются. / Умилостивление за народ наш молитву, / яко кадило благовонное, / херувимски Богу приносивый, / не остави и нас молитвами твоими.
Слава, глас 8:
Богоизбранный и богопрославленный пастырю земли Российския, / восславил еси Имя Божие, / пророком и апостолом добре поревновавый, / бежати гнева Божия / и творити плоды покаяния мудре наставивый, / о Отечестве и людех его теплый молитвенниче, / веры православныя славный ревнителю, / яко пресветлая луча, / просиял еси, путь к Жизни Вечней озаряя, / неисчерпаемую благость Божию нам открывая, / учителю правды Божия, / еюже вси христолюбивии людие украшаются. / Темже вопием тебе: / поминай нас в твоих молитвах, священномучениче преславне.
И ныне, Богородичен воскресен:
Безневестная Дево, / Яже Бога неизреченно заченши плотию, / Мати Бога Вышняго, / Твоих рабов мольбы приими, Всенепорочная, / всем подающи очищение прегрешений: / ныне наша моления приемлющи, / моли спастися всем нам.
Тропарь, глас 4:
Украшение священников явился еси Константине, / восприем бо крест яко оружие, / проповедию славною устраняя раскол и ереси, / благовествовал еси Иисуса Христа глаголя: / спасайтеся от рода сего развращеннаго. / Сего ради мученическою кровию обагрися славне, / и ныне радуяся с лики ангельскими, моли Христа Бога / Церковь Всероссийскую от ересей и расколов сохранити / и спасти души наша.
Слава, и ныне, Богородичен гласа.

НА УТРЕНИ
На Бог Господь: тропарь святаго, дважды. Слава, и ныне, Богородичен.
По 1-й кафизме седален, глас 3.
Преславным веры исповеданием / прелести угасил еси злославие, обличив идольское безбожие, / и всесожжение Божественное быв, / чудотворением озаряеши концы, отче преподобне. / Христа Бога моли даровати нам велию милость. (Дважды).
Слава, и ныне, Богородичен:
Божественная скиния была еси Слова, / Едина Пречистая Дево Мати, Ангелов честнейшая, / и мене паче всех осквернена прегрешеньми многими, / очисти молитвами Твоими, / подающи, Чистая, велию милость.
По 2-й кафизме седален, глас 4.
Возсияв якоже солнца заря, / блистаеши, преподобне, всему миру светло учении твоими, / богогласе Константине светоносне, мучеником похвало. (Дважды).
Слава, и ныне, Богородичен:
Пречистеи руце Твои, Дево Мати, простерши, / покрый покровом Твоим уповающия на Тя и Сыну Твоему зовущия: / всем подаждь, Христе, милости Твоя.
По полиелеи величание:
Величаем тя, / священномучениче Константине, / и чтем честная страдания твоя, / яже за Христа претерпел еси.
Псалом избранный: Услышите сия вси языцы:
По полиелеи седален, глас 8. Подобен: Премудрости:
Окормляемь силою вседетельною / и ветрилом окриляемь крестным, / преплыл еси житейское море / и к Божественному пристанищу воистинну достигл еси, / добродетелей куплю многу сотворив, / ихже Владыпе всех принесл еси, / и еже "благий рабе" слышал еси, и сим последующая: / темже, Константине блаженне, моли Христа Бога грехов оставление подати / чтущим любовию святую память твою. (Дважды).
Слава, и ныне, Богородичен:
В напасти многоплетенныя впад / от враг видимых и невидимых, / бурею одержимь безчисленных согрешений моих, / и, яко к теплому защищению и покрову моему, Чистая, / ко пристанищу притекаю Твоея благости. / Темже, Пречистая, из Тебе Воплощенному безсеменно молися прилежно / о всех рабех Твоих, непрестанно молящих Ти ся, Богородице Пречистая, / молящи Его присно согрешений оставление даровати / воспевающим достойно славу Твою.
Степенна, 1-й антифон 4-го гласа.
Прокимен, глас 4: Честна пред Господем / смерть преподобных Его. Стих: Что воздам Господеви о всех, яже воздаде ми?
Всякое дыхание: Евангелие от Луки, зачало 106.
По 50-м псалме стихира, глас 6:
Поюще твое достохвальное житие на земли / и славу юже стяжал еси на Небеси, / молим тя, прехвальне Константине, / вознеси о нас молитвы к престолу Пресвятыя Троицы, / да помиловани будем в День Судный / и спасаеми твоими молитвами, / радостию вопием тебе: / радуйся, силою молитвы твоея чистыя узы супружеския укрепляяй, / радуйся, крине, присно благоухаяй, росою благодати Божия напоенный, / радуйся, истиннаго просвещения и христианскаго благочестия ревностный насадителю, / радуйся, порфирою покаяния всех облекаяй, / радуйся, диадимою благодати славно увенчанный, / радуйся, прехвальный Константине, земли Богородския молитвенниче предивный.
Канон святаго, глас 8.
Песнь 1
Ирмос: Воду прошед яко сушу / и египетскаго зла избежав, / израильтянин вопияше: / Избавителю и Богу нашему поим.
Припев: Святый священномучениче Константине, моли Бога о нас.
Светом Христовым просвещаемь, расколы и ереси искореняя, / священномучениче славне Константине, / молитвами твоими, преблаженне, омраченную душу мою просвети, / яко да воспою тя.
Лествицею добродетелей на Небеса возшел еси, / тем и Христос тя, священномучениче, еще на земли суща, / в меру возраста духовнаго приведе / и земли Саратовския наставника постави.
О, радосте наша, Константине пресвитере, / великия твоя апостольския подвиги и труды почитаем, / ты бо многия приходящия к тебе научил еси / право воспевати Единосущную Троицу.
Богородичен: Даждь нам помощь мольбами Твоими, Пречистая, / прилоги отревающи лютых обстояний.
Песнь 3
Ирмос: Ты еси утверждение / притекающих к Тебе, Господи. Ты еси Свет омраченных, / и поет Тя дух мой.
Всесовершенну жертву живу / себе Христу принесл еси мучением, / совестию мученическою, / прежде пострадав воздержанием.
Господь призва тя в землю Богородскую, / и житием явился еси, Константине, образ благочестия, / люди православныя ко спасению приводя, / и Церкве Христовы великий пресвитере, / темже память твою вернии сошедшеся любовию почитаем.
Управив богоразумно, преподобне, ум твой, / заповедей Спасовых делателю нелицемерный в житии твоем бываяй, / темже славный воин Христов явился еси / и мученик добропобедный.
Богородичен: Подаждь нам помощь мольбами Твоими. Пречистая Богородице, / от скорбей находящих на ны / и печалей многих, Пречистая, избави.
Седален, глас 3:
Божественным духом просвещен, / свирепство мучителей безбожных дерзновением пастырским, богомудре, посрамил еси, / и, прешед прелести пучину, / ко пристанищу Божественному достигл еси; / отче Константине, Христа Бога моли / даровати нам велию милость.
Слава, и ныне, Богородичен:
Кийждо идеже спасается, / тамо праведно и притекает: / и кое иное таковое прибежище, / яко Ты, Богородице, / покрывающее души наша.
Песнь 4
Ирмос: Услышах, Господи, / смотрения Твоего таинство, / разумех дела Твоя / и прославих Твое Божество.
Красуйся, граде Богородск, / имея молитвенника твоего, / священномученика Константина, / молящагося присно о душах наших.
Стадо Христово, священномучениче, наставляя к свету богоразумия, / безбожия тьму отгнал еси.
Безбожных нечестие / труды и поты твоими / и преславными мучении, отче, / яко священномученик посрамил еси.
Богородичен: Ты похвала христианом еси, Владычице, / и стена к Тебе прибегающим, / Тя и ныне на помощь призываем, Госпоже: / от обдержащих нас бед, спаси души наша.
Песнь 5
Ирмос: Просвети нас повелении Твоими, Господи, / и мышцею Твоею высокою, / Твой мир подаждь нам, Человеколюбче.
Твое богомудрое наставление, Константине славне, / яко мед сладкий бывающе всем к тебе приходящим: / ты бо, по глаголу апостолову, / горняя, а не земная всегда мудрствовати люди учил еси.
Жезлом веры отгоняеши ересей и расколов ловитвы / и союзом любве спряг стадо твое, / надеждою и верою сохраняеши невредно.
Священнаго Писания от юности научився, богоносне Константине, / ралом словес твоих окаменевшая богородских людей сердца возделал еси, / и Божественное семя в них всеяв, / плод красный Христу принесл еси.
Богородичен: Теплая Заступнице к Тебе прибегающим и ненадеющихся Надеждо, / виждь скорбь людей Твоих / и милость Свою яви, Пречистая.
Песнь 6
Ирмос: Молитву пролию ко Господу / и Тому возвещу печали моя, / яко зол душа моя исполнися, / и живот мой аду приближися, / и молюся, яко Иона: / от тли, Боже, возведи мя.
В Царство Небесное вшед узким путем и прискорбным, по заповеди Владыки своего Христа, / священномучениче отче Константине, / широкий и пространный путь возненавидев, / ум мой помраченный просвети, / да возмогу малое мое моление принести, совершая днесь пречестную память твою.
Каменю веры, Петру апостолу уподобился еси, / распялся еси мирови во всем житии твоем, священномучениче, / и нозе свои невозвратно к Небесному шествию управил еси, / ныне со святыми предстоя Святей Троице, / моли о нас Единаго Благаго Человеколюбца.
Не отвратися, Господи, от моления сего, / ниже помяни множество грехов наших, / паче же помяни древния Своя милости, и ради благоутробия Твоего, / и ради Константина страдальца добляго, / не лиши нас обетованных Твоих милостей / и подаждь прощение прегрешений наших.
Богородичен: Лютых мя мук и тьмы кромешныя, / и геенны Твоими молитвами свободи, Дево, / имаши бо волю и силу, / Господа рождшая, Единаго Преблагаго.
Кондак, глас 4:
От младенчества к Богу устремився, / благочестия ревнителю и раскола искоренителю, / священномучениче Константине, / Христа мужественно исповедав, / жесточайшая мучения приял еси, / Церкве Русския благое украшение, / моли Христа Бога / грехов оставление подати / чтущим любовию святую память твою.
Икос:
Павлову словеси поревновав, всехвальне Константине, / песньми почтил еси российских пастырей, / приснобдящих пред Престолом Небеснаго Царя о нашем Отечестве, / с нимиже радуяйся ныне, учителю и наставниче, / моли Христа Бога / сохранится нам в вере и благочестии невредимо.
Песнь 7
Ирмос: От Иудеи дошедше отроцы, / в Вавилоне иногда / верою Троическою пламень пещный попраша, поюще: / отцев Боже, благословен еси.
Милосердия и помощи Спаса и Господа чаяй, / егда призван был из земли Саратовския, / прешел еси, Константине, подвизатися в град Богородск. / Похваляюще дерзновение твое, вопием: / отцев наших Боже, благословен еси.
В Богородске граде от святителя Тихона чин иерейский получив, / помале первый среди иереев поставлен был еси, / и тамо непрестанно о душах человеческих попечение имея, / собратьев и мирских наставлял еси, / како по заповедем Божиим жити, / да благословен будет Бог отец наших.
В темнице заблуждших посещая, / учил еси их прилежно творити молитву Господню, / и сим исправил еси нерадивых и обратил тех ко Господу, / Емуже вси вернии возопиим: / отец наших Боже, благословен еси.
Богородичен: Узы смерти и ада Расторгшаго, / страдании, смертию и воскресением / род человеческий от вечнаго осуждения Спасшаго Мати, / Того моли, да прощение грехов всем верным дарует.
Песнь 8
Ирмос: Царя Небеснаго, / Егоже поют вои Ангельстии, / хвалите и превозносите во вся веки.
Егда вознеслся еси на Кресте, Слове, / абие предста Жертва Сыновняя, / завеса церковная раздрася: / был еси, Спасе, Сам прежде заклан от людей злочестивых, / предводя вся во образ Твой и за имя Твое умученныя, / ихже память ныне прославим.
Оле нечестия богопротивных, на Владыку Кроткаго руки простерших, / ихже не ужасе ни тьма полуденная, ни трус, / ни воскресших явление, ниже самое Владычне востание, / но на горшее паки простирахуся, / в беззаконием праведников заклании паки страсти Христове ругатися мняху, / тии же незлобием агнчим в смерти своей Агнца Божия величаху.
О преславнаго чудесе! / Како святии загражденными усты обличают жестосердие, / како кровей своих течением заграждают потоки беззакония, / нас же подвизают ко трезвению, памяти смертней непрестанней и небоязненному истины исповеданию?
Богородичен: Твоею, Дево, всечестною иконою древле Творец всех чудодействова, / спасе град наш Богородск от нахождения иноплеменник, / сице и земли нашей буди, Госпоже, покров и заступление.
Песнь 9
Ирмос: Ужасеся о сем Небо, / и земли удивишася концы, / яко Бог явися человеком плотски, / и чрево Твое бысть пространнейшее небес: / тем Тя Богородицу / Ангелов и человек чиноначалия величают.
Киими песньми святыми воспоем священномученика Константина, / кровьми своими страсть Христову изобразивша, / злостраданьми Ему уподобившася?
Целомудрию твоему и чистоте поругатися ищуще, / безбожнии бесоводимии тя избраша, отцу своему диаволу пожрети желающе, / но явился еси жертва Господеви непорочная, спострадалец Спасов.
Божественное бысть некое Смотрение в безвременней лютей кончине твоей, отче, / да страдании твоими, вкупе же и сонма новых мучеников, утвердится Церковь Российская, / обновится и славно украсится, Жениху Своему Христу предстоящи. / Мы же, подвиги твоя зряще и День Судный помышляюще, / восплачим о себе горько.
Богородичен: Прегрешения моя умножишася, / прещения и суда достоин сый, Чистая, / припадая зову Ти: / прежде конца подаждь ми очищение и умиление, и нравом исправление.
Светилен, глас 6.
Яко иерей Божий, / на земли вязати и решати имеяй власть. разреши зол моих союз, / и к любви Божией причти мя / и Царствия причастника, блаженне, соделай молитвами твоими.
Богородичен: Просвети, Чистая, душу мою омраченную / и вечнующаго мя пламене и мрака избави ходатайством Твоим, яко да с веселием хвалю Твое величие.
На хвалитех стихиры, глас 6.
Благодать желанную, священномучениче, / нося Небесную земная же небрегл еси: / сего ради, яко безплотен, / страдальческое избрал еси житие, / яко присносущнаго потока пищи / благонасладитися хотя богоприятне, / и слезами изсушил еси / мутный источник страстей, / и напоил еси душепищныя класы.
Любовию и надеждею вооружився / и верою огражден, / разорил еси хитрости и коварства вражия, / и победитель быв, ныне венценосец живеши / с Божественными лики Ангел и преподобных окрест Престола всех Царя.
Мир церквам испроси, священномучениче, твоими молитвами, / Отечеству нашему помощь на сопротивныя, / и рог Российския земли возвыси, блаженне, / предстоя Престолу Святыя Троицы, / да присно тя ублажаем.
Малое сие и смиренное хваление приими, священномучениче, / от недостойных устен и мерзкаго моего языка, / и от сердца нечиста: / ты бо, Константине преславне, / преочищенный душею и телом, / паче солнечных лучей облистал еси, / Божия заповеди совершив, / и к Свету Невечернему преставился еси. / Верно тя чтущим молися / подати оставление грехов, / отче блаженне.
Слава, глас 4:
Нов сад якоже маслина, / на Божией трапезе положился еси, / яко сын ходящих по пути Господню: / мучения ради благослови тя Господь, / и узриши благая Вышняго Сиона, / наслаждаяся Божественнаго радования со всеми святыми, / священномучениче Константине, достопетый: / имже общники нас быти / мольбами твоими сотвори.
И ныне, Богородичен, глас тойже:
Богородице, всех Царице, / православных похвало, / еретичествующих шатания разори / и лица их посрами, / не поклоняющихся Тебе, ниже чтущих, Пречистая, / честный Твой образ.
НА ЛИТУРГИИ
Блаженны на 8, песни 3-я и 6-я,
Прокимен, глас 7: Восхвалятся преподобнии во славе и возрадуются на ложах своих. Стих: Воспойте Господеви песнь нову, хваление Его в Церкви преподобных.
Апостол ко Евреем, зачало 334.
Аллилуиа, глас 2-й: Священницы Твои облекутся в правду, / и преподобнии Твои возрадуются.
Евангелие от Луки, зачало 67.
Причастен: В память вечную будет праведник: