Гимнография сщмч. Сильвестра, архиеп. Омского

Гимнография: 
[Служба]  [Великое бдение]  [Бдение]  [Полиелей]  [Славословие]  [«на 6»]  [«на 4»]  [Тропарь]  [Кондак]  [Молитва]  [Канон]  [Акафист]
Иконы: 
Тропарь: 
тропарь, гл. 4
 
Уподобился еси Пастыреначальнику Христу/ служением богодарованной пастве/ и труды апостольскими,/ и образом кончины твоея,/ пригвожден быв/ и тростию в сердце прободен,/ исполненное Духа Свята,/ священномучениче Сильвестре,/ молися Господеви,/ Его же сладце возлюбил еси/ и нашим маловерным сердцам/ любовию Христовою согретися// и спастися душам нашим.
 
Молитва: 
Молитва свщмч. Сильвестру -архиепископу Омскому и Павлодарскому.
О предивный угодниче Христов, священно мучениче Сильвестре! Со умилением преклонше колена пред честным новописанным образом твоим, хвалим, славим и величаем прославльшаго тя Бога и нам недостойным даровавшего заступника тя и ходатая, Ему же ты с лики новомучеников Российских и всех Небесных Сил предстоиши. Умоли Господа, да утвердит во святей стране Российския живый дух Православной Веры и благочестия, да вселит в земле Сибирской любовь пламенеющую к Вере Отеческой, наипаче же оградит нас всесильной рукой Своей от раскольнических лжеучений и ересей. Да подаст людем дух покаяния в богоотступлении и служении суетам мира сего, и всем же нам дух смирения, кротости и послушания. Да препояшет ны благодатию Своею и утвердит в брани за спасение наше. Ему же подобает всякая слава, честь и поклонение Отцу и Сыну и Святому Духу, ныне и присно и во веки веков. Аминь. 
 
Акафист: 
Акафист святому священномученику  Сильвестру архиепископу Омскому и Павлодарскому
 
 
 
 
 
Тропарь, глас 4
Инравом причастник, / и престолом наместник Апостолом быв, / деяние обрел еси, Богодухновенне, / в видения восход, / сего ради слово истины исправляя, / веры ради пострадал еси даже до крове, / священномучениче Сильвестре, / моли Христа Бога // спастися душам нашим.
Величание
Величаем тя, / святый новомучениче Сильвестре,/ и чтим честная страдания твоя, // яже за Христа претерпел еси.
 
Кондак 1
Избранный от мира, предивный угодниче Христов, / веры православныя благовестниче / юже яко добрый сеятель на ниве Христове /  в сердца чад Божиих усердно всеял еси / не престай молитися за ны ко Господу / даровати земли нашей мир и безмятежие, / церкви Святей от ересей и расколов ограждение, / да твоими молитвами от бед избавляеми, благодарно зовем ти: // радуйся, священномучениче Сильвестре, земли Омския молитвенниче.
 
Икос 1
Ангела пламенеюща духом и во плоти суща человека, избра тя Господь быти служителя Церкви Святей и стаду Своему пастыря добра, от юности бо твоея Богу Единому сердцем и душею прилежал еси. Мы же имуще в тебе образ пастыря добра умильно взываем ти:
Радуйся, Богом избранный и освященный наш пастырю; радуйся, увенчанный архиерейскою благодатию.
Радуйся, чистый разумом, всею душею Бога возлюбивый; радуйся, в житии твоем Тому усердно послуживый.
Радуйся, в незлобии сердце твое соблюдый; радуйся, иго Христово от юности радуяся восприявый.
Радуйся, земли Омския благодатное прирастание; радуйся, со всеми в земли нашей просиявшими, неба церковного украшение.
Радуйся, священномучениче Сильвестре, земли Омския молитвенниче.
 
Кондак 2
Видяще тя, пастыря, подвигом добрым подвизающася, и «аки елень на источники водныя» к Богу устремляющася, словесное стадо свое аки ангельским хлебом обильно питающа, святителю отче наш Сильвестре, умиляемся сердцем и душею, благодаряще Бога, даровавшаго нам тебе пастыря верна и стража добра, воспеваем дивную песнь: Аллилуия.
 
Икос 2
От юности твоея, богомудре Сильвестре, орлу горнему уподобился еси, от мирския суеты к высоте небесней воспарив, да постигнеши глубины премудрости Божия и в свете истиннаго благочестия стадо твое мудре просветиши. Мы же наставляеми тобою покланятися Богу, в Троице славимому, воспеваем ти похвалы сия:
Радуйся, Бога во Святей Троице прославляемаго, познати нас просветивый; радуйся, Свет Истинный, просещающ всякого человека, всем возвестивый.
Радуйся, Правды Божия ревностный искателю и Христа обретый; радуйся, неутомимый Ея глашатаю и провозвестниче.
Радуйся, Закон Божий на скрежалех сердца твоего начертавый; радуйся, в слове, житии, любве, духе и вере образ нам показавый.
Радуйся, в дому Божии, яко финикс процветый; радуйся, чистотою сердца богатый, верою и разумом Необъятного объявый.
Радуйся, священномучениче Сильвестре, земли Омския молитвенниче.
 
Кондак 3
Яко серна от тенет, от суеты мира сего отбегл еси и к иноческому подвигу потщался еси; Христу Богу непорочным житием благоугодил еси, достоблаженне священномучениче; в трудах же и бдениих, от стражи утренния до нощи дремания веждома твоима и сна очесем не давый; сего ради жилище Духа Святаго быти сподобился еси, и в Троице певаемому Богу, яко орган многострунный, непрестанно воспевал еси святую песнь: Аллилуия.
 
Икос 3
Кедру ливанскому уподобился еси, святителю Христов Сильвестре, изрядно укрепивый душу твою святостию служения соборнаго в богоспасаемей Полтаве, идеже чистому нраву и благочестию церковному учил еси отроки и отроковицы земли полтавския; темже видяще тя, ревностию учительства пламенеюща, вопием ти сице:
Радуйся, Господа ради дом родительский оставивый; радуйся, путем тесным за Христом последовавый.
Радуйся, Ангельское житие благодатно стяжавый; радуйся, яко юный Исаак смиренно в руце Божии себя цела отдавый.
Радуйся, образе кротости и о молитве Иисусове присное памятование; радуйся, помощи Божия непрестанное призывание.
Радуйся, сыновней любовию к небесным воспаривый; радуйся, молитвою твоею землю Омскую освятивый.
Радуйся, священномучениче Сильвестре, земли Омския молитвенниче.
 
Кондак 4
Видяще тя Пастыреначальник Христос, учительнаго подвига ревнителя, трудов же и миссионерских деланий неленастнаго исполнителя, постави тя юным отроком наставника и учителя. Ихже делом и словом к служению Церковному мудре уготовлял еси, и преуспевати в житии благонравнем отечески наставлял еси; да и тии, в возраст пришедши и поминающи благия заветы твоя, множецею воспоют дивную песнь Богу: Аллилуия.
 
Икос 4
Слышаша и видеша людие православнии равноангельное житие твое, священномучениче Сильвестре, воодушевишася к подвигу служения Святей Церкви Божией, наипаче же узревши тя, ангельского образа сподобльшася и высокаго сана архимандрита достигша, со умилением сердечным пообещали пред олтарем Господним, такожде послужити во священных олтарех  Церкве Православныя, воспевши тебе похвалы сия:
Радуйся, Христа Бога возлюбивый, и с Ним за мир заклатися обещавый; радуйся, Христу спогребыйся, смерти жало славно поправый.
Радуйся, теплотою души твоея затепливший и души верных твоих чад; радуйся, во мнозех скорбех и болезнех, терпению Христову нас научивый.
Радуйся, стада Христова пастырю верный; радуйся, молитвенниче усердный за народ наш и землю отцев и братий.
Радуйся, обуреваемым тихое пристанище; радуйся, заблюдшим благостный наставниче.
Радуйся, священномучениче Сильвестре, земли Омския молитвенниче.
 
Кондак 5
Богосветлое светило, Духом Святым возженное, воспламени Господь сердце твое, мучениче земли Омския, да упасеши и избавиши боголюбивый народ наш от вражды с Богом и попрания Святых Заповедей Его, ихже дух злобы поднебесный низвергнути на сие тщащеся. Бурею безбожия испытуем ты, Святче, реши в сердце твоем многовидныя мучения прияти, да не умолкнет победная песнь Богови на земли Сибирстей: Аллилуия.
 
Икос 5
Видевши гонители злочестивии, яко твердо твое упование на Господа и любовь к Нему, злобою распаляхуся, лютые страдания измышляху, мнящи гладом и мразом и темничными изнурении веру твою попрати, посмеяние диаволу явити, святый крестоносче Сильвестре и вси исповедницы земли Сибирския. Ты же, духовный пастырю страдальцев, новыя весны прозябение Христово явися и вся козни бесовския попра; о сем приносим ти таковая:
Радуйся, трием отроком в Вавилоне верою единонравный; радуйся, Даниилу в рове львинем в мужестве единославный. 
Радуйся, Церкве Христовы споборниче; радуйся, Православного вероучения неисчерпаемый источниче.
Радуйся, славу мира сего, яко суетную презревый; радуйся, блага временныя нивочто же вменивый.
Радуйся, велие дерзновение к Богу имеяй; радуйся, пламенною любовию к Богу горяй.
Радуйся, священномучениче Сильвестре, земли Омския молитвенниче.
 
Кондак 6
Проповедание медоточивых уст твоих, якоже мука и елей в Сарепте Сидонской никогдаже источашеся, ниже заграждашеся, преславне исповедниче Христов Сильвестре; видим бо тя благовествующа людем богоспасаемаго града Киева и града Святаго Петра, идеже в служении церковнем пребывая, учил еси взывати Богу дивную песнь: Аллилуия.
 
Икос 6
Видевши подвизи всероссийскаго воинства, егда на поле брани упорно стояше за святое Отечество наше и за народы его населяющия, возносил еси Святую Безкровную Жертву, за в подвизе своем доблестнем кровь проливших. Учил еси, святителю Божий, како подобает молитися и трудитися, возлагая на олтарь Отечества живот свой и кровь проливая безценную; страдания своя приявый воеже освятити земли нашу в Дом Божий – Жилище Духа Святаго; сему преславному подвигу удивляющися, вопием немолчно сицевая:
Радуйся, в годину бед и испытаний отеческою любовию нас утешаяй; радуйся, оградо крепкая и надеждо Православного стада несокрушимая.
Радуйся, лампадо светлая, в молитвеннем подвизе неугасимая; радуйся, пастырю, Веры Православныя истинный ревнителю.
Радуйся, ересей и расколов нечетивых искоренителю; радуйся, православнаго благочестия насадителю.
Радуйся, чистотою сердца твоего Господа  славы созерцавый; радуйся, в Волю Божию всего себе отдавый.
Радуйся, священномучениче Сильвестре, земли Омския молитвенниче.
 
Кондак 7
Ходатай пред Богом преизряден явился еси, священномучениче Сильвестре, егда дерзновенно подъял еси труд ежечасного крестнаго хождения. В немже просвещая и воодушевляя присных, высоко и победносно воздвизал еси дивное и преславное знамение Креста Господня, усердно моляся Богу за люди твоя, воспевающия: Аллилуия.
 
Икос 7
Новым и немеркнущим светилом явился еси, богомудре Сильвестре, и вся твоя духовныя чада, страстотерпцы Христовы, по всей земли нашей; в лесах тайги непроходней, в рудех подземельных, гладом и хладом томими, в поте кроваве изнуряеми суще; обаче идеже умножишася страдания ваша, тамо преизобиловаша чада Христова, из злодеев и убийц кающихся. Тако бо от беззакония к повиновению Божию многия приведосте; о сем восхваляем вас сицевыми похвалы:
Радуйтеся, лесорубы, козни вражия низлагающии; радуйтеся, дровосеки, всякую лесть бесовскую пресецающии.
Радуйтеся, в подземелии шахт, светом Христовым сияющии; радуйтеся, зачерствелую совесть к покаянию побуждающии.
Радуйтеся, алчущих правды Божия питателие; радуйтеся, нищих духом и опечаленных в унынии утешителие.
Радуйтеся, нераскаянныя грешники ко Христу приведшии; радуйтеся, с ними же в Царствие Небесное вшедшии.
Радуйся, священномучениче Сильвестре, земли Омския молитвенниче.
 
Кондак 8
Чудно соделавый пути нашего спасения Человеколюбец Господь, промыслительно, аки росу на руно Гедеоново, дарова тя Омской пажити, архипастыря прилежна и православного учения хранителя тверда; воеже в венец земнаго подвига твоего поставити тя пред Престолом Славы Своея, молитвенника о нас тепла и неусыпна. Сего ради Богу, во благо все устроящу, со умилением зовем: Аллилуия.
 
Икос 8
Весь мир ужасом многим содрагашеся, слышавше, киими истязаньми и мученьми изнуряем был еси, достаславный новомучениче Христов, егда тя люте истяжавше пытки страшныя привменяху и гвоздьми острыми, яко стрелы израняху твое честное тело даже до крове. В сем стоянии адамантове за веру Православную пребывших зряху; умиляемся благодарным сердцем и ужасаемся, состраждуще душею и вопием ти сице:
Радуйся, исповедниче новый и преславный; радуйся, кораблю веры непотопляемый.
Радуйся, пред Богом за нас молитвенниче теплейший; радуйся, в скорбех грядущих на нас помощниче вернейший.
Радуйся, во бранех со диаволом терпению нас научаяй, радуйся, в стоянии за веру отеческую нас укрепляяй.
Радуйся, богомудрых умов услаждение; радуйся, боголюбивых душ увеселение.
Радуйся, священномучениче Сильвестре, земли Омския молитвенниче.
 
Кондак 9
Вси людие паствы Омския видяще тя, архипастыря своего, смирением и кротостию сияюща, прославиша Бога, святителю отче Сильвестре. Ты же, Христовою любовию к ним исполненный, яко отец о чадех своих, слезныя молитвы Богу день и нощь изливал еси. Сего ради людие твои, умиляющеся сердцем и душею, воспеваху Богу, даровавшему им таковаго святителя дивна, возносяще песнь: Аллилуия.
 
Икос 9
Проповедником славным явился еси, богомудре Сильвестре, всякую лесть бесовскую заграждаяй и посрамляй, еюже дух злобы поднебесный мняше народы наша на путь нечестия совратити. Овых ересьми и расколы, овых же всякаго нечестия и безбожия насадители; тщашеся похулити Имя Пресвятыя Троицы. Ты же, вземше Крест Христов, имже благословил еси люди Божия, направил еси их на стезю Заповедей Святых. О сем, в вере отцев наших спасаеми, поем тебе таковая:
Радуйся, огнь и воду прошедый; радуйся, веру православную кровию твоею утвердивый.
Радуйся, Христа возлюбивый и к Нему прилепивыйся; радуйся, погубивый временная, Вечная же унаследовал еси.
Радуйся, вдов и сирот усердный питателю; радуйся, гонимых за веру отеческую усердный попечителю.
Радуйся, дольняго мира мудрейший узниче; радуйся, горняго мира вернейший соузниче.
Радуйся, священномучениче Сильвестре, земли Омския молитвенниче.
 
Кондак 10
Спасти хотя многия, попусти Господь беды велия на народы наша, да якоже кукиль от пшеницы злыя измет и сожжет, верныя же, яко пшеницу соберет в житницы Своя и прославит их, яко верных рабов Своих. Мы же волю Божию приемлюще, терпению и злостраданию их научимся, егда к испытаниям призовет нас Господь, да ублажая подвизи их, поем неложно песнь Богу: Аллилуия.
 
Икос 10
Стена тверда и ограждение крепкое явился еси, многострадальне исповедниче, к тебе прибегающим и молитвеннаго предстательства твоего просящим в новых испытаниих веры сущих. Ты же, владыко святый, буди предстателем пред Богом за нас многогрешных, с верою и упованием вопиющих ти таковая:
Радуйся, врагом Веры Христовы необоримая преградо; радуйся, от разорения храмов Божиих несокрушимая оградо.
Радуйся, омраченная зловерием, Светом Веры Христовы просвещаяй; радуйся, учителю кротости и воздержания.
Радуйся, светильниче веры православныя; радуйся, от сетей вражиих верныя избавляй.
Радуйся, ходити по стопам Заповедей Божиих нас научаяй; радуйся, ко Пресвятей Богородице о нас непрестанно взываяй.
Радуйся, священномучениче Сильвестре, земли Омския молитвенниче.
 
Кондак 11
Пение, иже приносим тебе, в похваление преславных подвигов и чудес твоих, достоблаженне Сильвестре, несть довольно, обаче ведаем благое твое о нас тщание и любовь твою. Благоволи, святый владыко, вняти молитвам нашим и избавити нас от прелести еретическаго зловерия и языческаго злонравия, да утренююще, чистым сердцем приносим о тебе песнь Христу Богу: Аллилуия.
 
Икос 11
Светом Божественныя Любве объят был еси, Сильвестре досточудне, егда призывал еси соузники твоя кающиися, радоватися, понеже Благодать Божия изобильно пребывает со всеми очистившими советь свою покаянием сердечным; яко чрез страдания временныя, готовися верным радость вечная, юже уготова Бог любящим Его. Ублажая сия радости Тайну Велию, молим вас прилежно, страдальцы преславнии, купно со святителем Сильвестром, утешите нас немощных, да спасаеми зовем вам немолчно:
Радуйтеся, Духа Святаго священное жилище; радуйтеся, Благодати Христовы славное вместилище.
Радуйтеся, яко орли к Солнцу Правды воспарившии; радуйтеся, к Свету Невечернему из юдоли плача возвысившиися.
Радуйтеся, Царствия Небеснаго наследницы; радуйтеся, вечныя славы сопричастницы.
Радуйтеся, в селениих праведных упокоение обретшии; радуйтеся, честнии праведницы с нами воспевающии славословную песнь святителю:
Радуйся, священномучениче Сильвестре, земли Омския молитвенниче.
 
Кондак 12
Благодать Божия изобильно излияся на тебе, присный наш молитвенниче, святителю Сильвестре, егда в темницу к безбожным, аки на пир веры православныя шел еси со иными страстотерпцы земли нашея. Воеже пребыти во блаженстве за Имя Господне, его же вы пронесосте в житии вашем, и ныне сподоби вас Господь Венца Славы и Бессмертия вопиющих: Аллилуия.
 
Икос 12
Поюще многострадальныя подвиги ваша и пламенную любовь яже ко Господу, священномучениче Сильвестре и вси новомученицы Сибирстии, славно Христу сораспявшиися, и от земных в Небесныя венценосно водворившиися, идеже Ангелом сликоствующе, нас немощных, напастьми испытуемых, поминайте. Мы же молитвенную надежду на вас имуще, Волю Божию, яко всеблагую приимем и скорбьми утешающеся зовем сицевая:
Радуйся, архиерею Божий, подобие Крестнаго распятия претерпевый; радуйся, за Истину пострадавый, Бога прославивый.
Радуйся, в заключении темничнем усердно Господеви послуживый; радуйся, путь Голгофских Страданий понесый.
Радуйся, с сотаинницы предстояй у Креста, Христу сораспявыйся; радуйся, земный ангеле, за град и Отечество наше молитву приносяй.
Радуйся, архипастырю града Омска, людем верным в покровение святыя мощи твоя даровавый; радуйся, явлением пречестных мощей твоих и неверных ко Господу приведый. 
Радуйся, священномучениче Сильвестре, земли Омския молитвенниче.
 
Кондак 13
О, многострадальне и всехвальне страстотерпче Сильвестре с соузники; славно сораспеншиися за Церковь Святую Православную, и кровьми своими в небесней со Христом священнодействовати сподобльшиися. Нынешнее наше моление приемши, от всех бед, скорбей и напастей нас избавите, наипаче же Церковь Святую, юже до крове возлюбисте; расколы и тлетворными ересьми снедаемую, миром оградите, да купно с вами вопием победную песнь Богу: Аллилуия.
(Этот кондак читается трижды, затем  икос 1 и кондак 1.)