Гимнография св. прав. Домники (Ликвиненко) Алешковской, Таврической (1967)
Служба блаженной Домнике Алешковской
НА ВЕЧЕРНИ
На Господи, воззвах:
стихиры, глас 8
О блаженная мати Домнико, /заступнице и покровительнице наша! / Ты от младых ногтей твоих страх Божий имела еси в сердце твоем, / духовныя очи твои к Горнему Иерусалиму устремляющи / и помышляющи выну о будущих, / яже и получила еси, преподобная. / Темже ныне молися / даровати нам мир и велию милость.
О блаженная мати Домнико, / тя ходатаицу и молитвенницу благоприятну имамы к Богу, / ты бо молиши за вся православныя люди, / яко да избавимся от бед, и скорбей, / и от всякаго навета вражия. / Тем прославляем твою святую память, / и восхваляем тя, блаженную в женах, зовуще: / не престай молящися о душах наших.
О блаженная мати, / кто не подивится житию и чудесем твоим, и не восхвалит тя? / Яко и по святем твоем преставлении / силою Божиею многая чудеса от честных мощей твоих источаеши, / яже подают исцеления приходящим к ним с верою. / Сего ради возопиим зовуще: / радуйся, преподобная мати Домнико, / великаго дара от Христа сподобившаяся / и ныне пребывающая во Царствии Небеснем с лики преподобных, / моли спастися душам нашим.
Слава, глас 6:
Воздержанием житие твое украсившая / и уды умертвившая / победила еси вражия прилоги, блаженная. / Темже со всеми святыми славим / и торжествуем святую память твою, / просяще обрести молитвами твоими / мир и велию милость.
И ныне, Богородичен: глас 6:
Кто Тебе не ублажит, Пресвятая Дево, / кто ли не воспоет Твоего пречистаго рождества, / безлетно бо от Отца возсиявый Сын Единородный, / Тойже от Тебе Чистыя пройде, / неизреченно воплощься, / естеством Бог сый, / и естеством быв человек нас ради, / не во двою лицу разделяемый, / но во двою естеству / неслитно познаваемый. / Того моли, Чистая, Всеблаженная, / помиловатися душам нашим.
Вход. Прокимен дне.
Чтения 3, преподобническая:
Премудрости Соломоновы чтение
Праведных души в руце Божией, и не прикоснется их мука. Непщевани быша во очию безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле искуси их и яко всеплодие жертвенное прият я. И во время посещения их возсияют и, яко искры по стеблию, потекут. Судят языком, и обладают людьми, и воцарится Господь в них во веки. Надеющийся Нань разумеют истину и вернии в любви пребудут Ему. Яко благодать и милость в преподобных Его, и посещение во избранных Его.
Премудрости Соломоновы чтение
Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение Свое и вооружит тварь в месть врагом. Облечется в броня правды и возложит шлем, суд нелицемерен. Приимет щит непобедимый, преподобие. Поострит же напрасный гнев во оружие; споборет же с ним мир на безумныя. Пойдут праволучныя стрелы молниины и, яко от благокругла лука облаков, на намерение полетят. И от каменометныя ярости исполнь падут грады, вознегодует на них вода морская, реки же потопят я нагло. Сопротив станет им дух силы, и, яко вихор, развеет их и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните судии концев земли. Внушите, держащии множества и гордящиися о народех языков, яко дана есть от Господа держава вам и сила от Вышняго.
Премудрости Соломоновы чтение
Праведник аще постигнет скончатися, в покои будет. Старость бо честна не многодетна, ниже в числе лет исчитается. Седина же есть мудрость человеком, и возраст старости житие нескверное. Благоугоден Богови быв, возлюблен бысть, и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господу душа его, сего ради потщася от среды лукавствия. Людие же видевше и не разумевше, ниже положше в помышлении таковое. Яко благодать и милость в преподобных Его, и посещение во избранных Его.
На литии стихиры, глас 1:
Свыше звана бывше, / а не от человек звание приим, / оставила еси труды земледелания твоего, / блаженная Домнико, / и на ниву многотрудную человеческих сердец / в годину богоборчества потекла еси усердне, / яко в вертограды Господа твоего, / во еже делати тыя и храните, / и многоплодны показати Владыце их, / да вера Православная паки на Руси Святей воссияет / в сердцах чтущих святую память твою.
глас 2:
Никтоже чести сам себе приемлет, / но званный от Бога, / темже и ты, святая мати Домнико, / не собою, ниже похотением людским, / но призванием божественным на делание твое многотрудное изшла еси, / ни на почести, ниже пиры, или телеси усладу, / но на поприще суроваго и терноноснаго жития, / на немже радость едина тя среташе, / яже веселит Христа исповедати не убоявшихся.
Слава, глас 6:
Возсия днесь священное твое торжество, / солнца светлейши, / сущия во тьме души озаряющее, мрак бесовский всегда отгоняющее, / досточудная мати Домнико.
И ныне, Богородичен, глас тойже:
Теплое заступление сущим в бедах / и Помощницу нашу, / Еюже от тли избавихомся, / Богородицу, вернии, всеусердно ублажаем.
На стиховне стихиры, глас 6:
Звана бысть свыше от овчих стад, святая Домнико, / якоже псалмопевец Давид, / гордая безбожных филистимлян низпроврещи, / и тем моли народ от Голиафовых хулений заступити, / и яко овцы упасти и оградити. / Темже и тебе на брань доведеся укрепити руце, / и камением веры безбожных гордыню сокрушати, / и мечем, и посохом поучения и молитвы / волки хищныя невходны во ограду сотворити, / в нейже и ны молитвами твоими, / блаженная Домнико, сохрани.
Стих: Честна пред Господем смерть преподобных Его.
Достойне хвалима еси на земли, / богоблаженная Домнико, / яко и по кончине твоей усердно к тебе прибегающия / от недуг свобождаеши. / Темже непрестанно моли /спастися душам нашим.
Стих: Праведницы во веки живут, и в Господе мзда их.
Ангельское житие на земли явила еси, / Домнико блаженная, / источниче умиления, милости течение, / елеем трудов твоих просвещая верно хвалящих тя. / Моли Человеколюбца от бед избавити / любовию чтущих всечестную память твою.
Слава, глас тойже:
Воздержанием житие твое украсивши / и плоть духу покоривши, / победила еси вражия прилоги, / во смирении же и пощении Бога взыскавши, / богоблаженная.
И ныне, глас тойже:
Богородице, Ты еси лоза истинная, / возрастившая нам Плод Живота, / Тебе молимся: молися, Владычице, / со святыми апостолы, / помиловати души наша.
Тропарь, глас 5:
От юности желанием Божественныя любве разжигаема, / суету житейскую отринула еси, / смирением крайним и молитвою непрестанною / мудрость Христову стяжала еси /и в годину лютую явилася еси наставница ищущим спасения. / Темже предстоя ныне Господеви в лице святых, / поминай молящихся тебе,/ Домнико, мати блаженная.
Ин тропарь, глас 7:
Чистоту жития твоего явивши, / блаженная мати Домнико, / в подвизех покаяния и смирения Богу угодила еси, / сего ради благодать стяжала еси / люди любовию ограждати, / от скорбей и печалей избавляти. / Моли Христа Бога / даровати нам велию милость.
НА УТРЕНИ
На Бог Господь, тропарь тойже.
По 1-й кафизме седален,
глас 4:
Мужески подвиги воздержанием претерпевши, низложила еси многокозненнаго, и в терпении житие поживши, преподобная Домнико, ныне прешла еси к Богу молящися о всех, священное твое совершающих торжество.
Слава, и ныне, Богородичен:
Всенепорочная Мати, возсияй ми покаяния лучу, и разори мрак безмерных моих зол, лукавыя отжени, Дево, помыслы сердца моего.
По 2-й кафизме
седален, глас 4:
Плоть распяла еси со страстьми, и все любление ко Христу имела еси, Домнико, Жениху твоему нетленному. Сего ради прияла еси венец, и ангельским ликом сочислилася еси, блаженная, молящися Тому прилежно о чтущих тя.
Слава, и ныне, Богородичен:
Труждает мя буря греховная, и возмущение безместных помышлений: умилосердися Всенепорочная, и руку ми помощи, яко Милостива простри, да спасся, величаю Тя.
Величание:
Ублажаем тя, / святая блаженная мати Домнико, / и чтим святую память твою, / ты бо молиши о нас / Христа Бога нашего.
Псалом избранный: Терпя потерпех Господа:
По полиелеи седален, глас 8:
Избранная от Бога блаженная мати, ко пристанищу жизни наставляема, без волнения жития бурю претекла еси, со ангелы песнословящи Избавителя, и молящися непрестанно о нас, яко да благодать и милость Христос дарует нам, празднующим любовию святую память твою.
Слава, и ныне, Богородичен:
Радуйся, ангелом радость мира приемшая. Радуйся, рождшая Творца Твоего и Господа. Радуйся, сподобльшаяся быти Мати Божия.
Прокимен: Дивен Бог во святых Своих, Бог Израилев.
Стих: В церквах благословите Бога, Господа от источник Израилевых.
Всякое дыхание: Евангелие от Матфея, зачало 104.
По 50-м псалме стихира, глас 6:
Житие твое, яко солнце / сердца верных озари / и многая к познанию истины приведе. / Темже и нас светом невечерним просвети, / мати блаженная Домнико, / всечестную твою память почитающих.
КАНОН, глас 6
Песнь 1
Яко посуху пешешествовав Израиль, /по бездне стопами, /гонителя фараона / видя потопляема, / Богу победную песнь /поим, вопияше.
Припев: Святая блаженная мати Домнико, моли Бога о нас.
Просвети ми ум и озари чувства моя, согрешений мрак души моея отгнав, Христе Боже, да чистою совестию возмогу песнь составити и возвеличити угодницу Твою, блаженную матерь нашу богомудрую Домнику.
Небесный Отец благоизволи тя прославити в Царствии славы со Ангелы и Святыми Своими, идеже во свете невечернем и присносущнем предстоиши Ему, свято и праведно на земли поживши, подвигом юродства Христа прославила еси и ныне молишися о всех, чтущих святую память твою.
Слава: Дивное и преславное чудо явися на тебе, преподобная мати, ангельски бо на земли пожила еси и, веру адамантову имея, победила еси немощь плотскую и прияла еси от Бога венец нетленный.
И ныне: Великому милосердию Агнца Твоего причастники сотвори нас, Богородице, в день великаго и славнаго Суда Его, егда второе на землю приидет со славою страшною.
Песнь 3
Несть свят, / яко же Ты, Господи Боже мой, / вознесый рог верных Твоих, Блаже, / и утвердивый нас на камени/исповедания Твоего,
Небесная возлюбивши, вся красная мира сего оставила еси, преподобная, и во обитель всельшися, неленостными трудами постничества Богу угодила еси, Егоже моли спастися душам нашим.
Христа нас ради волею до зрака рабия смирившагося возлюбила еси, блаженная, бдением и молитвами душевныя страсти умертвив, на гору безстрастия взошла еси, Домнико богомудрая.
Слава: Мрак житейских заблуждений и житейския гордости светлостию святых молитв, Домнико святая, прожени, да помощию твоею грехов оставление приимше, милость у Христа Бога обрящем.
И ныне: Преблагословенная Богородице, многая скорби в земней жизни Твоей претерпевшая, помози нам крест земнаго жития в терпении, благодарении и радовании до конца понести.
Седален, глас 4:
Любит милость и истину Господь, и ты, блаженная мати Домнико, подобяся Тому, буди милостивая ходатаица о спасении нашем, да тебе ради и мы, обретше благодать, не отпадем вечныя славы, яко память твою святую песньми ныне величаем.
Слава, и ныне: Богородичен:
Уневестившаяся Создателю Твоему, Дево Неневестная и Мати Избавителя нашего Христа, моли Духа Святаго Господа вселитися в ны и присно в нас пребывати и скверну нашу очистити, яко много может молитва праведныя матери, Домники блаженныя, еяже, яко Мати Милосердная, молитвы о нас приими.
Песнь 4
Христос моя сила, / Бог и Господь, / Честная Церковь / боголепно поет, взывающи,/от смысла чиста, о Господе празднующи.
Христолюбивых людей в вере и благочестии наставляла еси, мати святая, непрестанныя молитвы о спасении их возносила еси Вседержителю. Темже молим тя: молитвами твоими и нас достойными наследниками Царствия Небеснаго соделай.
Подвиги твоя духовныя под личиною юродства скрыла еси, Домнико богомудрая, и, аки крин небесный, процвела еси в земли Херсонстей добродетельми твоими: смиренномудрием, терпением скорбей и молитвами, яже непрестанно Господеви возносила еси. Сия же боголюбивыя добродетели испроси и нам, творящим ныне святую память твою.
Слава: Подвиг твоих великих и славных ради, прияла еси венец нетленный от Христа Спаса нашего и ныне с преподобных и блаженных лики на небесех присно радуешися, поминай убо и нас, святая мати наша Домнико, да молитвами твоими сподобимся и мы улучити Царствие Небесное.
И ныне: Заступнице скорбящих, Надеждо ненадеющихся, Богородице Всепетая, моли прилежно избавится нам от бед и скорбей.
Песнь 5
Божиим светом Твоим, Ближе, / утренюющих Ти души любовию озари, молюся, / Тя ведети, Слове Божий, / истиннаго Бога, / от мрака греховнаго взывающа.
О святая мати наша, преподобная Домнико, предстояще престолу Божию, нас, долу сущих, от всякия находящия на ны напасти сохрани, вся раздоры и брани умири, да прочее время живота нашего во всяком благочестии и чистоте поживем, твоими молитвами ограждаеми.
Исцеления подаеши всем, с верою к тебе притекающим, Домнико святая, темже ныне молим тя мы, грешнии: печаль нашу на радость преложи и от всякия напасти и скорби святыми твоими молитвами нас избави.
Слава: Во узах темничных и иных злостраданиях сущим отраду и вспоможение святыми и всесильными твоими молитвами даруеши и к покаянию всех нас призываеши.
И ныне: К Тебе припадающе, Царице Небесная, и верою покланяющеся, славословим Тя: радуйся, Богоблаженная Дево, покрове и ограждение наше, Помощнице в бедах сущим, спаси ны, помощи не имущия, на Тя бо упование возлагаем.
Песнь 6
Житейское море, / воздвизаемое зря напастей бурею, / к тихому пристанищу Твоему притек, вопию Ти: / возведи от тли живот мой, Многомилостиве.
Разум богопросвещенный стяжавши, Домнико блаженная, егда дела благая творила еси в житии твоем и егда подвиг юродства Христа ради подъяла еси, и ныне душа твоя во благих водворяется, прияла бо еси от Бога нетленный венец.
Добродетелию преукрашенная и благодатию Божественною освященная, праведная мати наша Домнико, предстоиши во славе небесней и молишися за ны, подаеши нам путей спасительных разумение и недужныя силою Христовою исцеляеши и подвизаеши нас за вся Творца нашего благодарити.
Слава: Родителей, чад не имущих, и жен плодоносящих отрада и вспоможение еси, мати Домнико, поелику присно молитвы твоя возносиши Милосердному Спасителю нашему.
И ныне: Мати Божия Милосердная, милости Твоея двери отверзи нам, озари нас светом Божественныя благодати Твоея и от мысленных волков соблюди нас невредимых, в вере Христовой нерушимо сподобивши нас благоугождати Сыну Твоему и Богу, и прияти от Него конец благий.
Кондак, глас 8:
Силою укрепляема Всемогущаго Бога, / в немощнем естестве подвиги многотрудныя явила еси, / и долу влекущия страсти / чистотою и бдением непрестанным умертвила еси. / Сего ради Христос Бог тя прослави дивными чудесы, / мати блаженная Домнико, / Емуже прилежно молися / подати нам мир и велию милость.
Икос:
Ангельскому поревновав житию, всю себе отрешила еси мирскаго сплетения, к подвигом же постническим мужески вооружившися, опасно путем Божиих заповедей шествовала еси, блаженная. Темже и мы, верно чтущии священную твою память, молим тя: Христу прилежно молися подати нам мир и велию милость.
Ин кондак, глас 8:
В мире сем благочестно и праведно поживше, / молитвою, юродством и иными подвиги досточудными Богу угодила еси, / сего ради и Господь в чудесех преславну тя показа, / Егоже, святая мати наша Домнико, моли / сохранити град сей и всех людей, благочестно тя почитающих.
Песнь 7
Росодательну убо пещь / содела Ангел /преподобным отроком, / халдеи же опаляющее веление Божие, / мучителя увеща вопити: / благословен еси, Боже отец наших.
Евангельским словесем внемлюще, крест свой на рамена восприяла еси и Христу последовала еси, преподобная мати наша Домнико, непрестанно Тому взывающе: благословен еси, Боже отец наших.
Вся искушения от мира, плоти и диавола находящия низложивши, востекла еси в чертоги Отца нашего Небеснаго, богоблаженная Домнико, идеже предстательствуеши о нас, заступления Твоего просящих и подвизаеши купно с Тобою взывати: благословен еси, Боже отец наших.
Слава: Кадилу, елею и миру благоуханному молитвы твоя подобны, восходят бо сия ко престолу Вседержителя Бога и милость Его преклоняют к нам, сердца же наша умягчают и врачуют и подвизают взывати: благословен еси, Боже отец наших.
И ныне: Милостию Твоею весь мир обогащаеши и души просвещаеши, Едина Всепетая, темже воспеваем Ти: Христа Бога нашего Мати, благословенна еси.
Песнь 8
Из пламене преподобным росу источил еси/и праведнаго жертву водою попалил еси: / вся бо твориши, Христе, токмо еже хотети. / Тя превозносим во вся веки.
В законе Божием часто поучающися и в заповедех Божиих безпорочно ходяще, дом Духа Святаго была еси, блаженная Домнико, темже и по смерти твоей не отлучи тя Господь от лика праведных, с нимиже ныне Богу поеши: превозносимый отцев Боже, благословен еси.
Кротостию ко всем землю кротких наследовала еси, милосердием и любовию ко ближним помилование от Бога получила еси, чистотою и целомудрием Бога зрети сподобилася еси, Емуже ныне со всеми святыми поеши: превозносимый отцев Боже, благословен еси.
Слава: Яко светило светлое уготовала еси кроткую душу твою, преподобная мати Домнико, темже по смерти твоей многая исцеления недужным, от винопития и иных болезней душевных и телесных подаеши всем с верою имя твое призывающим и нелицемерно Творцу воспевающим: превозносимый отцев Боже, благословен еси.
И ныне: Господа моего и Бога Мати Безневестная, дерзновение имущи к Нему, заступи и сохрани мя Твоим ходатайством, яко да воспою: превозносимый отцев Боже, благословен еси.
Песнь 9
Бога человеком невозможно видети, / на Негоже не смеют чини Ангелъстии взирати, / Тобою же, Всечистая, явися человеком / Слово воплощенно, /Егоже величающе, / с Небесными вои / Тя ублажаем.
Разум имела еси в души, и смирение, и Божественную кротость, и веру несумненну, и любовь к Богу, всенощными мольбами приближающеся Ему и тамо сущими светлостьми ублажаема, озаряема и просвещаема.
Отошла еси в селения праведных и духом предстоиши Присносущному Свету: призри убо на ны, живущия в селениих многомятежнаго мира сего, и пособствуй сущим во бранех, угоднице Христова, яко песньми тя величаем.
Слава: Моления о нас ко Владыце Христу не престай приносити, святая Домнико, яко мати чадолюбивая, вспомоществуя верным в подвизе спасения, яко сосуд благодати Божия избранный.
И ныне: Ты еси Ангелов радосте, ты еси праведников доброто, ты еси верных Надеждо; ты еси соблюдение наше, ты еси мост к жизни нестареющей приводяй всех, верою и любовию Тя, Богородице, величающих.
Светилен:
Якоже солнце светоносно, возсия ныне, блаженная мати, память твоя, вся верныя веселящи, иже молитвенно взывают ти: молися прилежно спастися нам.
Слава и ныне, Богородичен:
Преблагословенна еси, Богородице Дево, Мати Неизреченнаго Света, Тя величаем и предстательства о нас пред Сыном Твоим всеусердно просим, Тя бо едину надежду имамы.
На хвалитех стихиры, глас 4:
Празднует Церковь твое преставление / и благознаменитый день твоего торжества: /житие бо на земли благочестно пожив, / Домнико преславная, / плод сторичествующий Владыце твоему принесла еси / и от Него сподобилася еси славы неизреченныя, / и ныне молишися о спасении душ наших.
Класы спелыя руце твои пожинаша, / егда землю, от неяже яко всяк человек изыде, возделоваше, / и се яко клас златый душа твоя восхищена бысть в житницу Христову, / и ныне просим тя, / мати блаженная Домнико: / молися о благоденствии нашем на земли / и вечнем спасении на небесех. В подвизех твоих молитвенных / привлекала еси многая души ко спасению, / сего ради Христос знаменьми и чудесы преславными / истинно тя украси, / мати блаженная Домнико, / моли о душах наших.
Слава:
Избави молитвами твоими, / мати Домнико, чада твоя / от всякия лютости противоборца / и Царствия Божия ны доведи, / молящияся тебе тепле, / да возможем ловления лукаваго избегнути / и конечнаго осуждения предстательством твоим.
И ныне, глас 8:
Еже содеяхом злая, / не помяни нам, Благая сущи, / егда душа наша разлучатися будет настоящего сего жития, / не возгнушатися молим Тя нашего недостоинства, / аще и много согрешаем вси, / буди нам, Мати, Заступница.
НА ЛИТУРГИИ
Прокимен, глас 7: Честна пред Господем / смерть преподобных Его.
Стих: Что воздам Господеви о всех, яже воздаде ми?
Апостол к Галатом, зачало 208. Аллилуиа, глас 1: Терпя потерпех Господа, и внят ми, и услыша молитву мою.
Евангелие от Луки, зачало 33. Причастен: В память вечную будет праведник:
Тропарь, гл. 5
От юности желанием Божественныя любве разжигаема, / суету житейскую отринула еси, / смирением крайним и молитвою непрестанною / мудрость Христову стяжала еси / и в годину лютую явилася еси наставница ищущим спасения. / Темже предстоя ныне Господеви в лице святых, / поминай молящихся тебе,/ Домнико, мати блаженная.
Кондак, гл. 8
Силою укрепляема Всемогущаго Бога, / в немощнем естестве подвиги многотрудныя явила еси, / и долу влекущия страсти чистотою / и бдением непрестанным умертвила еси. / Сего ради Христос Бог тя прослави дивными чудесы, / мати блаженная Домнико, / Емуже прилежно молися / подати нам мир и велию милость.
Молитва
О достоблаженная мати Домнико, ты ныне душею на небеси пред Престолом Божиим предстоиши, телом же на земли почиваеши, и данною ти свыше благодатию различная чудеса источаеши! Темже взирающе на святый твой образ и предстояще раце честных мощей твоих, радуемся о преславнем скончании жительства твоего и чтим святую память твою. Ты же, предстоя Престолу Божию, услыши нас, грешных, молящихся тебе, приими молитву нашу и принеси ю ко Милостивому и Человеколюбивому Спасителю нашему. Испроси нам у Христа Бога мирное и безмятежное житие, здравие душевное и телесное, земли благоплодие и во всем всякое изобилие и благоденствие, да сподобимся предстательством твоим, аще и недостойнии есмы, видети благая на земли живых, славяще единаго во святых Своих славимаго Бога, Отца и Сына и Святаго Духа, ныне и во веки веков. Аминь.
Акафист блаженной Домнике Алешковской
Кондак 1
Избранная угоднице Христова и дивная благочестия наставнице, / в земли Херсонстей подвигом добрым подвизавшаяся, / святая блаженная Домнико, / хвалебныя пения приносим ти, молитвенницы твои: / ты же, яко имущая дерзновение ко Господу, / Того моли помиловати нас, чтущих святую память твою / и с верою и любовию взывающих ти: / Радуйся, святая блаженная Домнико, молитвеннице о душах наших.
Икос 1
Ангелом подражати в земном житии своем восхотевши, о чистоте душевней и телесней возревновала еси, блаженная Домнико, и благочестно житие поживши, венцем нетленным от Бога увенчалася еси и ныне, в Небесных обителех со Ангелы ликовствуя, молися за ны, сице тебе поющих: Радуйся, земли Херсонския похвало. Радуйся, всех православных радование. Радуйся, от младенчества в любви к Богу воспитанная. Радуйся, во след за Христом радостно потекшая. Радуйся, мирскаго треволнения избегшая. Радуйся, тихаго пристанища взыскавшая. Радуйся, святая блаженная Домнико, молитвеннице о душах наших.
Кондак 2
Видя красоту небесную обители Печерския и ведая о богоугодном житии преподобных отцев ея, ихже души в Горних селениях ныне веселятся, телеса же, подвиги многими утружденныя, в пещерах нетленно почивают, вожделела еси, блаженная мати, подражая им, во обители святей подвизатися, да с лики преподобных купно воспоеши во Царствии Отца Небеснаго: Аллилуиа.
Икос 2
Разумея молитвенное предстательство угодников Божиих за род христианский, ко святителю Николаю, скорому защитнику сирых и обидимых, молитвы твоя возносила еси, богомудрая Домнико. Мы же, такожде на молитвенное заступничество святых уповая, со умилением зовем ти сице: Радуйся, в сиротстве своем покровительством угодников Божиих утешавшаяся. Радуйся, житиями святых в добродетели утверждавшаяся. Радуйся, от ранния юности службы Божественныя возлюбившая. Радуйся, молитвою непрестанною услаждавшаяся. Радуйся, смирения исполненная. Радуйся, послушанию навыкшая. Радуйся, святая блаженная Домнико, молитвеннице о душах наших.
Кондак 3
Силою благодати Божия влекома, во обитель Алешковскую притекла еси, блаженная Домнико, желая мир греховный оставити и Господу неленостно работати, поя Ему: Аллилуиа.
Икос 3
Имея велие усердие к молитве, псалмы Давидовыми и акафистным пением душу свою услаждала еси; монастырския же послушания со тщанием исполняющи, образ всем смирения и терпения явила еси. Сего ради приими от нас похвалы сия: Радуйся, псалмопением непрестанным душу свою умилявшая. Радуйся, Господа всяческих выну славословившая. Радуйся, во обители Пресвятыя Богородицы добре потрудившаяся. Радуйся, послушание игумении и сестрам во всем явившая. Радуйся, молитву и труд в себе дивно сочетавшая. Радуйся, примером послушания воле Божией бывшая. Радуйся, святая блаженная Домнико, молитвеннице о душах наших.
Кондак 4
Бури мирския суеты не возмогоша поколебати тя, святая Домнико, возлагая бо все упование свое на Господа и на Пречистую Его Матерь, яко адамант тверд в вере пребыла еси; житие же свое во обители Алешковстей провождающи, молитвою пред иконою Божия Матери Феодоровскою дух свой укрепляла еси, непрестанно поя Богу: Аллилуиа.
Икос 4
Слышаще вси и видяще дивное и слезное моление твое, блаженная, за обитель, егоже ты в уединении с воздетыми горе руками возносила еси, зело удивляшеся. Обаче, егда наста время гонений от безбожных, уразумеша тогда о скорбех, на обитель и насельниц ея грядущих. Мы же, воспоминая сие, глаголем ти сице: Радуйся, скорби, на обитель грядущия, духовными очима своими зревшая. Радуйся, грядущая, яко близ сущая, созерцавшая. Радуйся, страдания и лишения безропотно переносившая. Радуйся, за обидящих тя слезно молившаяся. Радуйся, на Господа все упование свое возлагавшая. Радуйся, призыванием Сладчайшаго имени Иисусова присно утешавшаяся. Радуйся, святая блаженная Домнико, молитвеннице о душах наших.
Кондак 5
оготечная звезда явилася еси, блаженная Домнико, во дни лютых испытаний и гонений: сестры бо своя, во изгнании сущия, непрестанно утешала еси, и всех приходящих к тебе жизнь свою в руце Божии вверяти наставляла еси, взывая с верою: Аллилуиа.
Икос 5
Видя Всеблагий Господь молитвенныя подвиги и добродетельное житие твое, блаженная мати, посла тя людем Своим во время тяжкия скорби во утешение. Ты же, созерцая невидимое, яко видимое, и грядущая, яко настоящая, нуждающимся советом благим помогала еси. От нас же приими пения сия: Радуйся, скорбных и печальных утешение. Радуйся, вдов и сирот благое попечение. Радуйся, странных и обуреваемых готовое пристанище. Радуйся, немощных и убогих присное вспоможение. Радуйся, заблудшия на путь добродетели наставляющая. Радуйся, ищущим спасения путь в Царствие Небесное указующая. Радуйся, святая блаженная Домнико, молитвеннице о душах наших.
Кондак 6
Проповедуют святость жития твоего, блаженная Домнико, избавлении тобою от бед и напастей. Темже и мы, прославляюще Бога, даровавшаго нам таковую усердную молитвенницу за нас, грешных, вопием Ему: Аллилуиа.
Икос 6
Воссияла еси светом праведнаго жития твоего, богоблаженная, в земли Херсонстей: в посте и воздержании, в нощных бдениих и псалмопениих пожила еси, благочестию и смирению всех поучающи, да и мы, тобою на путь спасения наставляеми, ублажаем тя: Радуйся, праведнице, от Бога нам дарованная. Радуйся, сердцем чистым Богови молитвы возносившая. Радуйся, Божия благодати цельбоносный источниче. Радуйся, посреде напастей нас не оставляющая. Радуйся, вопрошаемых мудрая советнице. Радуйся, заблуждающихся и в недоумении сущих добрая вразумительнице. Радуйся, святая блаженная Домнико, молитвеннице о душах наших.
Кондак 7
Хотяй спасти тобою многия Владыка Христос во времена сия последняя, даде тебе нам, блаженная Домнико, во образ праведности и долготерпения. Ты бо крест свой безропотно несла еси чрез скорбное и многотрудное житие твое, поучающи приходящих к тебе в теплоте сердечней воспевати Богу: Аллилуиа.
Икос 7
Новую наставницу и молитвенницу яви тя Господь людем Своим, преподобная мати, яко подвиги твоими и чудесы всю землю Херсонскую облистала еси. Мы же, благодаряще Бога за сие милостивное о нас промышление, сице зовем ти: Радуйся, в небесней славе Ангелом уподобившаяся. Радуйся, благая утешительнице всех, в молитве к тебе притекающих. Радуйся, в терпении твоем свыше укрепленная. Радуйся, показующая нам образ кротости и незлобия. Радуйся, вся красная мира сего ни во чтоже вменившая. Радуйся, Промыслу Божию всецело себе предавшая. Радуйся, святая блаженная Домнико, молитвеннице о душах наших.
Кондак 8
Странно и дивно бе житие твое, имже утверждала еси веру и упование в людех, многия бо от сна греховнаго возставляла еси к покаянию: овым исцеление подающе, овым же скорую кончину возвещающе, иных же тайныя помыслы обличающе. Темже молим тя, Домнико блаженная, просвети тьму нашего маловерия, наставляющи нас к доброделанию, да на Страшнем Суде Христове не постигнет нас участь шуияго стояния, но да со избранными сподобимся Всемогущему Богу взывати: Аллилуиа.
Икос 8
Вся любве Божественныя исполнена была еси, святая Домнико: скорбящих утешающи, немощных защищающи, нищих ущедряющи, заблудших на путь спасения наставляющи. Сего ради приносим ти таковая: Радуйся, правды Божия нелицеприемная возвестительнице. Радуйся, немудрых богомудрая наказательнице. Радуйся, по морю житейскому нас путеводящая. Радуйся, к подвигам благочестия всех призывающая. Радуйся, стяжавшая к Богу велие дерзновение. Радуйся, с верою прибегающим к тебе присное утешение. Радуйся, святая блаженная Домнико, молитвеннице о душах наших.
Кондак 9
Всякия претерпела еси в житии твоем скорби, гонения, поношения и болезни, ныне же, на небесех о Господе радуяся, молися за ны, преподобная Домнико, да и мы безропотно и смиренно скорби и вся злая, нам бываемая, переносити возможем, Господу за вся поющи: Аллилуиа.
Икос 9
Ветии многовещаннии недоумеют по достоянию восхвалити тя, блаженная, ибо многая и преславная чудодействия еще в житии твоем явила еси и по преставлении твоем благодатию Божиею творити сия не престаеши. Мы же, на помощь твою уповающе, благодарно взываем ти: Радуйся, преподобная мати, памяти благия достойная. Радуйся, по блаженней кончине твоей Богом возвеличенная. Радуйся, с девствующими, яко девственница возвеличенная. Радуйся, Небеснаго крова взыскавшая и получившая. Радуйся, в чертог Небеснаго Жениха во гласе радования восшедшая. Радуйся, прославляти и благодарити за вся Господа нас вразумляющая. Радуйся, святая блаженная Домнико, молитвеннице о душах наших.
Кондак 10
Спасения залог, Православную веру, до конца дней своих сохранила еси в сердце своем, блаженная Домнико, темже молим тя: от всяких ересей и расколов нас соблюди и помози нам в Православии непоколебимо пребывати, и верно пети Богу: Аллилуиа.
Икос 10
Стеною молитв твоих, всехвальная мати, огради нас от всякаго душевреднаго искушения диавольскаго, яко тебе дарова нам Преблагий Бог покров и защиту душам и телесем нашим. Темже убо просим тя: помози нам во всякой скорби и обстоянии, сице тебе вопиющим: Радуйся, путь смирения во спасение нам указующая. Радуйся, образ терпения и незлобия нам являющая. Радуйся, потемненныя очи душ наших просвещающая. Радуйся, страсти наша небесною прохладою орошающая. Радуйся, к тихому пристанищу нас приводящая. Радуйся, предстательнице наша в бедах и напастех. Радуйся, святая блаженная Домнико, молитвеннице о душах наших.
Кондак 11
Пение всеумиленное приносим ти, угоднице Божия Домнико, мы недостойнии, от тебе чающе милости получити, ты же посети нас и данною ти от Бога благодатию исцели, вопиющих: Аллилуиа.
Икос 11
Светом Тройческим осияваема, со всеми святыми предстоиши ныне на небеси Престолу Царя царствующих, Домнико преподобная, и оттуду, яко светозарное светило, просвещаеши землю Херсонскую, разгоняющи мрак заблуждений и указующи путь к небесному блаженству. Сего ради прославляюще тя, глаголем: Радуйся, Царство Небесное унаследовавшая. Радуйся, Солнцем правды озаренная. Радуйся, свеще, горением к Богу сердца наша возжигающая. Радуйся, мир Божий в души людей приносящая. Радуйся, яко тобою имя Господне во всех пределех земли нашея прославляется. Радуйся, яко тобою свет любве Божия всюду осиявается. Радуйся, святая блаженная Домнико, молитвеннице о душах наших.
Кондак 12
Благодать, данную ти от Бога и велие сострадание твое к страждущим, богоблаженная Домнико, ведуще, светло празднуем святую память твою и тебе, покровительнице нашей, молебныя похвалы возносяще, поем Всещедрому Богу: Аллилуиа.
Икос 12
Поюще многочудесное прославление святых мощей твоих, исповедуем неисчетная твоя благодеяния, явленная и присноявляемая тобою всем с верою и любовию к тебе притекающим, ихже не лиши и нас, смиренных, упование на тя возложивших и тако тебе вопиющих: Радуйся, яко на небесех ныне пред Господем предстоиши. Радуйся, яко о людех пред Богом выну предстательствуеши. Радуйся, града твоего крепкое ограждение. Радуйся, земли Херсонския незыблемое утверждение. Радуйся, чтущих память твою пред Богом поминающая. Радуйся, о прославляющих тя Господа умоляющая. Радуйся, святая блаженная Домнико, молитвеннице о душах наших.
Кондак 13
О прехвальная угоднице Божия, блаженная мати Домнико, приими смиренное сие хваление наше, и твоим теплым предстательством у Царя Славы испроси нам в немощех исцеление, в добродетелех преспеяние, от врагов видимых и невидимых избавление, от вечныя муки свобождение и Царства Небеснаго наследие, да с тобою присно поем Богу: Аллилуиа.
